वीरगंज । हुण्डी तथा सुन कारोबारीसंग संलग्न ६० लाख नेपाली रुपैँया भारतीय प्रहरीले नेपाल भारतको सिमावर्ति सहर रक्सौलबाट बरामद गरेको छ ।
सिमावारपार हुने अपराधिक गतिविधि नियन्त्रणका लागि गोप्य सुचनाको अधारमा भारतिय प्रहरीले रक्सौलको नागारोडस्थित गुडको कारोबार गर्ने ध्रुप प्रसादको घरबाट उक्त रकम सहित भारतीय रुपैयाँ बरामद गरेको हो ।
आईतबार दिउसो पूर्वी चम्पारण मोतिहारीका सहायक प्रहरी अधीक्षक शिखर चौधरीको नेतृत्वमा रहेको प्रहरीले रक्सौलमा बसेर नेपाल भारतमा हुण्डी तथा सुनका लागी रकम आदानप्रदान गराउने ध्रुप प्रसाद भन्ने व्यक्तिको घरमा छापामारी गरि ३४ लाख ३४ हजार ५ सय रुपैयाँ भारतिय रुपैयाँ र ६० लाख १८ हजार नेपाली रुपैयाँ बरामद गरेको मोतिहारी अधिक्षकको कार्यालयले जनाएको छ ।
नेपालमा दैनिक एकसय बढी मोटरसाइकल मार्फत हुण्डी तथा सुनको कारोबार हुने गरेको स्राेत बताउँछ । ग्रामिण भेगमा जोखिम हुदाँ नेपाल भारतको मुख्य नाका वीरगंज भन्सार कार्यालय भएरै प्रहरीको सेटिङमा हुण्डी कारोबारी हुने गरेको स्रोत बताउँछन् । सुरुवातमा प्रहरीले हुण्डीको रकम बरामद गरेपनि पछिल्लो समय हुण्डी कारोबारीलाई समाउन सकेको छैन् । मोटरसाइकलको भाइजर, सिटमुनि फल्स बटम बनाई दिनकै करोड बढी हुण्डी कारोबार हुने गरेको देखिन्छ । भारतमा शनिवार हुने लोकसभा निर्वाचनलाई दृष्टगत गर्दै मतदान प्रभावित पार्न रकमको चलखेल गर्न सक्ने सुचनाको अधारमा भारतिय प्रहरीले पहिलो पटक ठुलो परिमाणमा नेपाली रुपैयाँ बरामद गरेको छ ।
स्रोतका अनुसार सिमावर्ति शहर रक्सौल र वीरगंज नाका हुण्डी तथा सुन कारोबारीको लागी सहज नाका हो । यसका लागी रक्सौलमा दर्जनबढी अलग्ग अलग्गै समुह हुण्डीमा सहभागि छन् भने नेपालतर्फ ढुवानी गर्ने भरियाका रुपमा त्यसका नेतृत्व गर्ने व्यक्ति र समुह पनि उक्तिकै संख्यामा रहेको स्रोत बताउँछन् ।
