नेपाली मूलकी ममता काफ्ले भट्टको बेपत्ता हत्या प्रकरणमा दुई वर्षभन्दा बढी समयपछि अमेरिकी अदालतमा सनसनीपूर्ण खुलासा भएको छ । आफ्नी पत्नी ममता काफ्लेको हत्या गरेको आरोपमा मुद्दा खेपिरहेका उनका पति नरेश भट्टले अदालतमा बयान दिँदै ममता आफ्नै घरको बेडरुममा मृत अवस्थामा फेला परेको र त्यसपछि आफूले उनको शव आराले काटेर व्यवस्थापन गरेको स्वीकार गरेका छन् ।
श्रीमान नरेश भट्टले ममताको हत्या आफूले नगरेको दाबी गर्दै उनले आत्महत्या गरेको हुन् सक्ने अदालतमा जिकिर गरेका छन् । यसअघि ममता स्वेच्छाले घर छाडेर न्युयोर्क वा टेक्सस गएको दाबी गर्दै आएका भट्टको पछिल्लो बयानले घटनालाई थप रहस्यमय र गम्भीर बनाएको छ ।
सन् २०२४ जुलाईमा अमेरिकाको भर्जिनिया राज्यस्थित मनासस पार्कमा भएको भनिएको यो घटनाको सुनुवाइ अहिले प्रिन्स विलियम काउन्टी सर्किट कोर्टमा जारी छ । नरेशमाथि प्रथम श्रेणीको हत्या, मृत शरीर लुकाएको र शवको अपमान गरेको अभियोग लगाइएको छ । उनले भने सबै अभियोग अस्वीकार गर्दै आएका छन् ।
आत्महत्याको अवस्थामा ममता भेटिएको भट्टको दाबी
अदालतमा आफ्नो पक्ष राख्दै भट्टले जुलाई २९, २०२४ को राति आफू दम्पतीको बच्चासँग अर्को कोठामा सुतेको बताएका छन् । जुलाई ३० को बिहान करिब ४ बजे बच्चाको हेरचाहका लागि उठेर मुख्य बेडरुममा पुग्दा ममता भुइँमा उत्तानो परेको अवस्थामा भेटिएको उनको दाबी छ । उनका अनुसार ममताको शरीर र वरिपरि वान्ता भएको थियो । त्यहाँ केही चक्की, औषधिको बोतल तथा कीटनाशक औषधिको खुला प्याकेटसमेत भेटिएको उनले बताएका छन् ।
ममतालाई बचाउन आफूले करिब ४५ मिनेटदेखि एक घण्टासम्म प्रयास गरे पनि उनी जीवित नरहेको भट्टले अदालतमा बयान दिएका छन् ।
प्रहरीलाई खबर नगर्नुको कारण डर भएको जिकिर
ममता अचेत अवस्थामा भेटिएपछि प्रहरी वा आपत्कालीन सेवा ९११ मा किन फोन नगरेको भन्ने प्रश्नमा भट्टले आफू अत्यधिक डराएको बताएका छन् । उनले ममतालाई आत्महत्या गर्न दुरुत्साहन गरेको आरोप आफूमाथि लाग्न सक्ने डरले तत्काल प्रहरीलाई खबर नगरेको जिकिर गरेका छन् । जीवनमा हजारौँ घण्टा ध्यान गरेको भए पनि त्यस्तो अवस्थामा आफूले ९११ मा फोन गर्न नसकेको विषयमा भने कुनै स्पष्ट जवाफ दिन नसकेको उनले बताएका छन् ।
आराले शव टुक्राटुक्रा पारेर फोहोरमा फालेको स्वीकार
अदालतमा सबैभन्दा सनसनीपूर्ण खुलासा गर्दै भट्टले बच्चालाई बेबीसिटरकहाँ पुर्याएपछि होम डिपोबाट केही सामग्री खरिद गरेको स्वीकार गरेका छन् ।
त्यसपछि करिब डेढ दिनभित्र घरमै विद्युतीय आराको प्रयोग गरी ममताको शव टुक्राटुक्रा पारेको र ती टुक्राहरू ब्यागमा राखेर घरको फोहोर फाल्ने कन्टेनरमा हालेको उनले बयान दिएका छन् । सरकारी वकिल म्याथ्यु स्विटले यसअघि प्रहरी तथा सञ्चारमाध्यमलाई दिएको बयानबारे प्रश्न गर्दा भट्टले आफूले झूटो बोलेको स्वीकार गरेका छन् । उनले आफूलाई झूटो बोल्ने व्यक्तिका रूपमा समेत प्रस्तुत गरेका थिए ।
अदालतमा तनाव, ममताकी आमा रुँदै बाहिरिइन्
भट्टले अदालतमा शव टुक्राटुक्रा पारेको विवरण सुनाउँदै गर्दा इजलासमा उपस्थित व्यक्तिहरूले आक्रोश व्यक्त गरेका थिए ।
ममताकी आमा भावविह्वल हुँदै रुँदै अदालत कक्षबाट बाहिरिएकी थिइन् । प्रत्यक्षदर्शीका अनुसार बयानका क्रममा केही ज्युरी सदस्यहरूले समेत भट्टको भनाइप्रति अविश्वास व्यक्त गरेका थिए । गम्भीर घटनाको विवरण सुनाउँदा पनि भट्टको अनुहारमा पश्चाताप नदेखिएको उनीहरूले बताएका छन् ।
फरेन्सिक प्रमाणले भट्टको दाबीमाथि प्रश्न
अभियोजन पक्षले अदालतमा पेस गरेका फरेन्सिक प्रमाणहरूले भट्टको बयानमाथि थप प्रश्न उठाएका छन् । फरेन्सिक विशेषज्ञहरूका अनुसार घरको मुख्य बेडरुमको कार्पेटमा भेटिएको रगत ममताकै भएको सम्भावना अत्यधिक छ । घटनापछि बेडको स्थान परिवर्तन गरी रगतका दाग सफा गरेर मेटाउने प्रयास गरिएको प्रमाणसमेत अभियोजन पक्षले प्रस्तुत गरेको छ । त्यस्तै, प्रहरीले बरामद गरेको विद्युतीय आरामा भेटिएको रगत तथा डीएनए परीक्षणबाट ममताकै जैविक प्रमाण रहेको पुष्टि भएको अभियोजन पक्षको दाबी छ । उक्त आरा भट्टले घटनाभन्दा केही महिनाअघि खरिद गरेको बताइएको छ ।
ममतामाथि कुटपिट भएको भाइको बयान
अदालतमा ममताका भाइ महेश काफ्लेले समेत भावुक हुँदै बयान दिएका छन् । उनले घटनाभन्दा केही महिनाअघि ममताले आँखामा नीलडाम देखिने तस्बिर पठाएर नरेशले कुटपिट गरेको जानकारी गराएको खुलासा गरेका छन् ।
ममताले उक्त तस्बिरलाई भविष्यमा प्रमाणका रूपमा सुरक्षित राख्नसमेत आग्रह गरेको उनका भाइले अदालतमा बताएका छन् । त्यस्तै, ममता बेपत्ता हुनुभन्दा सातदेखि आठ महिनाअघिदेखि नै नरेशले सम्बन्धविच्छेदको विषय उठाउने गरेको र घटनापछि ममताका गरगहनासहित आफ्नो विवाहको औँठीसमेत एक साथीलाई जिम्मा लगाएको विवरण सुनुवाइका क्रममा बाहिर आएको छ ।
ममता काफ्लेको न्यायका लागि आवाज उठाउँदै आएका उनका परिवार तथा साथीहरूले भट्टको पछिल्लो बयानलाई पूर्वनियोजित र बनावटी भएको दाबी गरेका छन् । यस घटनामा अदालतमा कानुनी प्रक्रिया तथा ज्युरीसमक्ष बहस जारी रहेको छ ।
ममताको शव अझै फेला नपरेको अवस्थामा भट्टको पछिल्लो बयान र अभियोजन पक्षले प्रस्तुत गरेका फरेन्सिक प्रमाणले मुद्दालाई थप गम्भीर तथा पेचिलो बनाएको छ ।
