अवैध रूपमा पेस्तोल बोकेर हिँडिरहेका तीन जनालाई सशस्त्र प्रहरीले ललितपुरबाट पक्राउ गरेको छ ।
सशस्त्र प्रहरी बलले मंगलबार विशेष सूचनाका आधारमा उनीहरूलाई पक्राउ गरेको हो । पक्राउ पर्नेमा रौतहटको चन्द्रनिगाहपुर नगरपालिकाका २२ वर्षीय सुशील स्याङ्तान, दोलखाको भीमेश्वर नगरपालिकाका २२ वर्षीय सुमन तामाङ र सुनसरीको धरान उपमहानगरपालिकाका १८ वर्षीय विप्लव राई रहेका छन् ।
प्रहरीका अनुसार उनीहरूको साथबाट एक थान पेस्तोल तथा सम्बन्धित सामग्री बरामद गरिएको छ । प्रारम्भिक अनुसन्धानका क्रममा उनीहरू अवैध हतियार बोकेर विभिन्न गतिविधिमा संलग्न हुन सक्ने आशंका गरिएको छ ।
पक्राउ परेका तीनै जनालाई आवश्यक अनुसन्धान तथा कानुनी कारबाहीका लागि सम्बन्धित निकायमा बुझाइएको सशस्त्र प्रहरीले जनाएको छ ।
यस घटनाबारे थप अनुसन्धान भइरहेको र अवैध हतियार ओसारपसार तथा प्रयोग नियन्त्रणका लागि सुरक्षा निकायले निगरानी कडा बनाएको पनि प्रहरीले स्पष्ट पारेको छ ।
