पर्सा निर्वाचन क्षेत्र नम्बर–३ का राष्ट्रिय स्वतन्त्र पार्टी (रास्वपा) का प्रतिनिधिसभा उम्मेदवार रामाकान्त चौरसियाले चुनावी अभियानलाई तीव्र बनाउँदै विभिन्न समुदायका अगुवा तथा स्थानीय व्यक्तिहरूसँग निरन्तर छलफल तथा जनसम्पर्क कार्यक्रम सञ्चालन गरेका छन् ।
चुनावी अभियान अन्तर्गत उम्मेदवार चौरसियाले क्षेत्रका विभिन्न टोल तथा बस्तीहरूमा पुगेर समुदायका अगुवा, बुद्धिजीवी, युवा, महिला तथा समाजसेवीहरूसँग भेटघाट गर्दै रास्वपाको सिद्धान्त, नीति, कार्यक्रम तथा भावी योजनाबारे जानकारी गराएका छन् । सो क्रममा उनले स्थानीय स्तरमा देखिएका समस्या, गुनासा र अपेक्षाहरू प्रत्यक्ष रूपमा सुन्दै समाधानका लागि पार्टीको तर्फबाट पहल गर्ने प्रतिबद्धता व्यक्त गरेका छन् । छलफल कार्यक्रममा सहभागी स्थानीयवासीहरूले शिक्षा, स्वास्थ्य, रोजगारी, खानेपानी, सडक तथा सुशासनका विषयमा आफ्ना माग र सुझाव राखेका थिए ।
उम्मेदवार चौरसियाले जनताको आवाज नै आफ्नो प्राथमिकता भएको उल्लेख गर्दै, निर्वाचित भएपछि क्षेत्रको समग्र विकास र पारदर्शी शासन प्रणाली स्थापित गर्न आफू दृढतापूर्वक लाग्ने बताए । यसैगरी, पर्सा–३ मा रास्वपाको जनसमर्थन विस्तारका लागि चौरसियाले विभिन्न व्यक्तिहरूलाई पार्टीको प्रचार–प्रसारमा सक्रिय बनाएका छन् । स्थानीय युवा तथा स्वयंसेवकहरूलाई समेट्दै घरदैलो, भेटघाट तथा जनचेतनामूलक गतिविधि सञ्चालन गरिएको छ ।
उम्मेदवार चौरसियाका अनुसार, पर्सा–३ का मतदाताहरू परिवर्तनको पक्षमा देखिएका छन् र रास्वपाप्रति जनआकर्षण दिनानुदिन बढ्दै गएको छ । उनले आगामी प्रतिनिधिसभा निर्वाचनमा घण्टी चुनाव चिन्हमा मतदान गर्न सबैलाई आग्रह गर्दै, जनताको भरोसालाई कर्म र इमानदारीमार्फत पूरा गर्ने प्रतिबद्धता दोहोर्याएका छन् ।
.jpg-2-1769587845.jpg)
