पर्सा निर्वाचन क्षेत्र नम्बर १ मा नेपाली कांग्रेसका तर्फबाट प्रतिनिधिसभा सदस्य पदमा उम्मेदवारी दिएका अनिल रुंगटा ले आफूले निर्वाचनमा गरेको खर्च विवरण निर्वाचन कार्यालयमा बुझाएका छन्।
रुंगटाले आफ्ना निर्वाचन प्रतिनिधि पुरुषोत्तम प्रसाद कुर्मीमार्फत शुक्रबार जिल्ला निर्वाचन कार्यालय पर्सामा खर्च विवरण पेश गरेका हुन्। पेश गरिएको विवरणअनुसार उनले निर्वाचन अवधिभर कुल २१ लाख ५० हजार रुपैयाँ खर्च भएको उल्लेख गरेका छन्। रुंगटाका अनुसार सबैभन्दा बढी रकम प्रचार–प्रसार सामग्री छपाइ तथा खरिदमा ५ लाख १७ हजार ३६० रुपैयाँ खर्च भएको छ।
त्यसैगरी खाना तथा खाजामा ३ लाख ६६ हजार ९२४ रुपैयाँ, सम्पर्क कार्यालय व्यवस्थापनमा ३ लाख २९ हजार ६५१ रुपैयाँ, साधन भाडा तथा इन्धनमा २ लाख ९७ हजार ४५४ रुपैयाँ खर्च गरिएको विवरणमा उल्लेख छ।
यस्तै सभा–गोष्ठी तथा अन्तरक्रियामा २ लाख ६० हजार ४५० रुपैयाँ, स्वयंसेवक परिचालनमा १ लाख ७० हजार रुपैयाँ, सामाजिक सञ्जाल व्यवस्थापनमा १ लाख ५४ हजार रुपैयाँ, मनोनयन दर्ता शुल्कमा १० हजार रुपैयाँ र मतदाता नामावली खरिदमा ३ हजार रुपैयाँ खर्च गरिएको जनाइएको छ। विविध शीर्षकमा ९९ हजार ५१ रुपैयाँ खर्च भएको पनि विवरणमा उल्लेख छ।
गत प्रतिनिधिसभा निर्वाचनमा यस क्षेत्रबाट हरि पन्त २७ हजार २७४ मत प्राप्त गर्दै विजयी भएका थिए। उनका निकटतम प्रतिद्वन्द्वी नेकपा (एमाले)का उम्मेदवार तथा पूर्वमन्त्री प्रदीप यादव १३ हजार ३० मतसहित दोस्रो स्थानमा रहेका थिए भने कांग्रेस उम्मेदवार रुंगटा ११ हजार ८८५ मतसहित तेस्रो भएका थिए।
