धनुषा क्षेत्र नम्बर १ मा उम्मेदवारी खारेज भएकी रास्वपा उम्मेदवार किशोरी साह कमलले दायर गरेको रिटको सुनुवाइ आइतबार हुने भएको छ।
न्यायाधीश विनोद शर्मा र मेघराज पोखरेलको संयुक्त इजलासमा साहले दायर गरेका छुट्टाछुट्टै रिटलाई एकैठाउँ राखेर सुनुवाइ हुने जनाइएको छ।
निर्वाचन आयोगले कर्जा सूचना केन्द्रको कालोसूचीमा नाम रहेको भन्दै मतदानको दुई दिनअघि साहको उम्मेदवारी खारेज गरेको थियो। त्यसपछि साह सर्वोच्च अदालत पुगेकी थिइन्। मतगणनापछि निर्वाचन अधिकृतको कार्यालयले नेकपा उम्मेदवार मातृका यादवलाई विजयी प्रमाणपत्र दिएको थियो। यसविरुद्ध पनि साहले सर्वोच्चमा रिट दायर गरेकी थिइन्।
न्यायाधीश सारंगा सुवेदीको इजलासले बिहीबार साहको नाम कर्जा सूचना केन्द्रको कालोसूचीमा नराख्न आदेश दिएको थियो। तर, शुक्रबार तय सुनुवाइमा उपस्थित हुन नसक्दा सुनुवाइ आइतबारका लागि सारिएको हो।
रास्वपाले प्रतिनिधिसभामा दुई तिहाइ पुर्याउने लक्ष्य राखेको अवस्थामा, साहको उम्मेदवारीबारे सर्वोच्चले दिने आदेशमा राजनीतिक ध्यान केन्द्रित भएको छ।
