पर्सा निर्वाचन क्षेत्र नम्बर–२ अन्तर्गत पर्सागढी नगरपालिका वडा नम्बर–२ का खेखरिया, झिँगण, छतुवन टाँडी, कटानी टोल तथा वडा नम्बर–४ को बकनरवामा राष्ट्रिय स्वतन्त्र पार्टी (रास्वपा)का प्रतिनिधिसभा सदस्य पदका उम्मेदवार सुशील कुमार कानुले घरदैलो तथा मतदाता भेटघाट कार्यक्रम सम्पन्न गरेका छन् ।
प्रतिनिधिसभा निर्वाचनलाई लक्षित गर्दै सञ्चालन गरिएको कार्यक्रममा बुद्धिजीवी, ज्येष्ठ नागरिक, युवा, महिला तथा कृषकहरूको उल्लेखनीय सहभागिता देखिएको थियो । घरदैलोका क्रममा उम्मेदवार कानुले टोल–टोलमा पुगेर स्थानीयसँग प्रत्यक्ष संवाद गर्दै उनीहरूको समस्या, सुझाव र अपेक्षा सुनेका थिए । स्थानीयवासीहरूले पर्सा–२ मा यसपटक परिवर्तनको लहर देखिएको प्रतिक्रिया दिएका छन् । बुद्धिजीवी तथा ज्येष्ठ नागरिकहरूले विगतमा अधुरा रहेका विकास योजना र आधारभूत सेवाको अभावप्रति असन्तुष्टि जनाउँदै अबको मतदानले सकारात्मक रूपान्तरण ल्याउने विश्वास व्यक्त गरेका थिए ।
युवाहरूले रोजगारी अभाव, सीप विकासका अवसरको कमी तथा खेलकुद पूर्वाधारको कमजोर अवस्थाबारे गुनासो गरेका थिए भने कृषकहरूले मल अभाव, सिँचाइ समस्या र उत्पादनको उचित बजार व्यवस्थापनको माग उठाएका थिए । उम्मेदवार कानुले क्षेत्रका प्राथमिक समस्याहरूलाई योजनाबद्ध ढंगले समाधान गर्ने प्रतिबद्धता व्यक्त गरेका छन् । उनले पर्सागढी क्षेत्रमा अस्पताल तथा स्वास्थ्य सेवा व्यवस्थापन सुधार, खेलकुद पूर्वाधार निर्माण, कृषकलाई समयमै मल उपलब्ध गराउने तथा सिँचाइका लागि पानीको दीर्घकालीन व्यवस्था गर्ने विषयलाई प्राथमिकतामा राख्ने बताएका छन् ।
साथै बेरोजगार युवालाई स्थानीय स्तर मै पशुपालन तथा कृषि–आधारित उद्यमसम्बन्धी प्राविधिक सीप तालिम प्रदान गरी स्वरोजगार सिर्जना गर्ने योजना अघि सारिएको जानकारी दिएका छन् । निर्वाचित भएपछि आधारभूत समस्या समाधानका लागि चरणबद्ध कार्ययोजना ल्याइने र जनप्रतिनिधि जनताप्रति उत्तरदायी हुने वातावरण बनाइने उनले बताए ।
पर्सागढी नगरपालिका वडा नम्बर–२ मा सम्पन्न घरदैलो कार्यक्रममा रास्वपाका नेता शर्फु आलमका अनुसार फिरोज मियाँ, समीर अन्सारी, धीरेन्द्र राउत, विनय कुमार ओझा, श्यामसुन्दर शाह, गंगा आचार्य, कविराज अर्याल, चन्द्रशेखर चौधरी लगायत नेता–कार्यकर्ताको सहभागिता रहेको थियो ।
.jpg-2-1769587845.jpg)
