आगामी फागुन २१ गते हुने प्रतिनिधिसभा सदस्य निर्वाचनका लागि मतपत्र छपाइको काम अन्तिम चरणमा पुगेको छ । निर्वाचन आयोगका अनुसार काठमाडौं उपत्यका वरिपरि रहेका जिल्लाको मतपत्र छपाइ अझै बाँकी रहेको छ ।
भक्तपुरस्थित जनक शिक्षा सामग्री केन्द्रमा नियमित रूपमा मतपत्र छपाइको काम भइरहेको छ । अहिलेसम्म ६३ जिल्लाका १३३ निर्वाचन क्षेत्रमा कुल एक करोड ७१ लाख ६३ हजार मतपत्र छपाइ सम्पन्न भइसकेको आयोगका सहायक प्रवक्ता प्रकाश न्यौपानेले जानकारी दिए ।
छापिएको मतपत्र हालसम्म डोल्पा, मुगु, जुम्ला, कालिकोट, हुम्ला, जाजरकोट, दैलेख, रुकुम (पश्चिम), सल्यान, सुर्खेत, बाजुरा, अछाम, बझाङ, डोटी, डडेल्धुराबाट शुरु गरी उदयपुर, मुस्ताङ, लमजुङ, तनहुँ, स्याङ्जा, बर्दिया, रुकुमपूर्व, दाङ, बाँके, नवलपरासी (बर्दघाट सुस्तापूर्व), पाल्पा, अर्घाखाँची, प्यूठान, रुपन्देही, रोल्पा, मनाङ, रामेछाप, सिन्धुली, रसुवा, सिन्धुपाल्चोक, कास्की, कपिलवस्तु, दोलखा, नुवाकोट र काभ्रेपलाञ्चोक गरी ६३ जिल्लामा वितरण तयारीको लागि छपाइ सकिएको छ ।
हाल काठमाडौं उपत्यका वरिपरिका १४ जिल्लाको मात्र मतपत्र छपाइ बाँकी छ र तीन दिनभित्र सबै मतपत्र छपाइ सकिने अनुमान गरिएको छ । अहिलेसम्म १५ हजार ३७१ बाकस मतपत्र प्याकिङ भइसकेको छ। प्रतिदिन करिब एक हजार बाकस प्याकिङ र ११–१५ लाख मतपत्र छपाइ भइरहेको छ ।
मतपत्र छपाइको काम गत पुस २२ गतेदेखि सुरु भएको थियो। पहिलो चरणमा १० लाख ९८ हजार २०० नमूना मतपत्र छपाइ सम्पन्न गरी विभिन्न जिल्लामा पठाइएको थियो । दोस्रो चरणमा २ करोड ८ लाख ३० हजार मतपत्र छपाइ, प्याकिङ र ढुवानी तयारी सम्पन्न भएको आयोगले जनाएको छ ।
प्रत्यक्षतर्फको निर्वाचनका लागि कुल २ करोड ३ लाख २३ हजार मतपत्र छाप्नुपर्ने छ ।
छपाइ सम्पन्न मतपत्र अहिले कर्णाली प्रदेशका १० जिल्लाका १२ निर्वाचन क्षेत्रमा पठाउन सुरु भइसकेको छ । सो क्षेत्रमा सल्यान, रुकुमपश्चिम, डोल्पा, मुगु, हुम्ला, कालिकोट, जुम्ला, जाजरकोट, दैलेख र सुर्खेतका मतपत्र ढुवानी गरिएको छ ।
.jpg-2-1769587845.jpg)
