प्रतिनिधिसभा निर्वाचन नजिकिँदै जाँदा पर्सा जिल्ला निर्वाचन क्षेत्र नम्बर–२ मा चुनावी गतिविधि तीव्र बन्दै गएको छ ।
यसैक्रममा राष्ट्रिय स्वतन्त्र पार्टीका उम्मेदवार सुशिल कुमार कानुले पर्सागढी नगरपालिका वडा नम्बर ६ चैनपुरमा घरदैलो कार्यक्रम सम्पन्न गरेका छन् । घरदैलो कार्यक्रमका क्रममा उम्मेदवार कानुले मतदाताको घर घरमा पुगेर स्थानीय समस्याबारे जानकारी लिएका थिए । उनले विगतमा अन्य राजनीतिक दलहरूले गरेका कमजोरी र अपूर्ण कामका बारेमा मतदाताबाट सुझाव लिँदै रास्वपाको नीति, सिद्धान्त र भावी योजना बारे जानकारी गराएका थिए ।
उम्मेदवार सुशिल कुमार कानुले शिक्षा सुधार, आधारभूत स्वास्थ्य सेवा सुदृढीकरण, युवा रोजगारी सिर्जना, कृषि आधुनिकीकरण तथा स्थानीय पूर्वाधार विकासलाई आफ्नो मुख्य चुनावी एजेन्डा बनाएको बताएका थिए । उनले पारदर्शिता, सुशासन र जवाफदेहितामा आधारित नयाँ राजनीतिक संस्कार स्थापित गर्ने प्रतिबद्धता व्यक्त गरेका छन् ।
स्थानीय मतदाताहरूले पछिल्लो समय नयाँ राजनीतिक विकल्पप्रति आकर्षण बढ्दै गएको प्रतिक्रिया दिएका छन् । स्थानियले विकास, रोजगारी र सेवा प्रवाहमा सुधार ल्याउन सक्ने नेतृत्व आवश्यक रहेको बताएका छन् । घरदैलो कार्यक्रममा स्थानीय युवा, व्यवसायी, कृषक तथा विभिन्न पेशामा आबद्ध व्यक्तिहरूको उल्लेखनीय सहभागिता रहेको थियो । सहभागीहरूले आगामी निर्वाचनमा विकासमुखी र जनउत्तरदायी नेतृत्वलाई समर्थन गर्ने धारणा व्यक्त गरेका थिए ।
उम्मेदवार कानुले जनताको सुझाव र आवश्यकतालाई आफ्नो चुनावी घोषणापत्रमा समेट्ने प्रतिबद्धता जनाउँदै घरदैलो अभियानलाई निरन्तरता दिने बताएका हुन् ।
