प्रतिनिधिसभा सदस्य उम्मेदवार अशोक टेमानीले घरदैलो अभियानलाई सशक्त बनाउँदै मतदातासँग प्रत्यक्ष संवाद गरेका छन् । जनता समाजवादी पार्टी (जसपा)का तर्फबाट पर्सा क्षेत्र नं. २ का उम्मेदवार टेमानीले चुनावी प्रचार–प्रसार अभियान अन्तर्गत बगही टोलमा स्थानीय बासिन्दासँग भेटघाट गरी उनीहरूको समस्या र अपेक्षाबारे विस्तृत जानकारी लिएका थिए ।
घरदैलो अभियानका क्रममा टेमानीले मतदाताको घर–घरमा पुगेर दैनिक जीवनसँग जोडिएका विषयमा चासो व्यक्त गरेका थिए । प्रत्यक्ष संवादमा स्थानीयले खानेपानी, शिक्षा, स्वास्थ्य र कृषि क्षेत्रका समस्यालाई मुख्य चुनौतीको रूपमा उठाएका थिए ।
स्थानीय बासिन्दाले शुद्ध खानेपानीको अभाव अझै कायम रहेको बताए । कतिपय टोलमा धारा र पाइपलाइनको व्यवस्था कमजोर रहेको र गर्मी याममा पानीको अभाव झनै गम्भीर हुने गरेको उनीहरूको भनाइ थियो। दैनिक उपभोगका लागि समेत पानी जुटाउन कठिनाइ हुने अवस्था रहेको बताइयो ।
मतदाताले सामुदायिक विद्यालयमा शिक्षक अभाव, कमजोर भौतिक संरचना तथा आवश्यक शैक्षिक सामग्रीको कमीले बालबालिकाको पढाइ प्रभावित भएको गुनासो गरे । उच्च शिक्षा लिन विद्यार्थीलाई अन्य क्षेत्रमा जानुपर्ने बाध्यता रहेको पनि उनीहरूले बताएका थिए ।
स्थानीयले स्वास्थ्य सेवाको अवस्था कमजोर रहेको भन्दै सामान्य उपचारका लागि पनि टाढाको स्वास्थ्य संस्थामा जानुपर्ने बाध्यता रहेको बताए । स्वास्थ्य चौकीमा आवश्यक औषधि, उपकरण र दक्ष स्वास्थ्यकर्मीको अभाव हुँदा बिरामीले समयमै सेवा पाउन नसकेको उल्लेख गरिएको थियो । आकस्मिक अवस्थामा तत्काल उपचार नहुँदा थप समस्या हुने भएको जानकारी स्थानीयले दिएका थिए ।
किसानहरूले समयमा मल र उन्नत बीउ नपाउँदा, सिँचाइको पर्याप्त व्यवस्था नहुँदा उत्पादन घट्ने र उत्पादन भएको बालीले उचित मूल्य नपाउने समस्याले किसान निराश भएको बताएका थिए। कृषि मुख्य पेशा भए पनि आवश्यक पूर्वाधार र सहयोगको अभावले जीवनयापन कठिन हुँदै गएको उनीहरूको गुनासो थियो ।
स्थानीयको समस्या सुनेपछि उम्मेदवार टेमानीले आफू निर्वाचित भएमा खानेपानी, शिक्षा, स्वास्थ्य र कृषि क्षेत्रलाई प्राथमिकतामा राखेर काम गर्ने प्रतिबद्धता व्यक्त गरे। उनले आधारभूत सेवाको सुधारलाई आफ्नो मुख्य एजेन्डा बनाउने र जनताको अपेक्षा अनुसार काम गर्ने प्रतिवद्धता जनाए ।
घरदैलो कार्यक्रममा बृद्धदेखि युवासम्मको उत्साहजनक सहभागिता देखिएको थियो । विकास, रोजगारी र आधारभूत सेवाको सुधारप्रति जनताको अपेक्षा स्पष्ट रूपमा देखिएको उक्त कार्यक्रममा करिब १२५ जना स्थानीयले जनता समाजवादी पार्टीमा प्रवेश गरेका थिए ।
पार्टी प्रवेश गर्नेहरूमा प्रमोद यादव, बिरेंद्र यादव, सुरजलाल मण्डल, पनालाल मण्डल, चोकट साहनी, विनोद यादव, शंकर राम, सुभधर राम, बलदेव राम, धनराज यादव, सुरज महतो, पनालाल यादव, सुनिता देवी, मधु महतो, दिपक महतो, लक्ष्मी कुमार, कलावती देवी, दिनेश महतो र रुपेश पटेल रहेका थिए ।
यस अभियानले टेमानीको प्रत्यक्ष संवाद र जनसम्पर्क क्षमतालाई अझ मजबुत बनाएको र मतदातासँगको नजिकको सम्बन्ध स्थापित गरेको बताइन्छ ।
.jpg-2-1769587845.jpg)
