प्रतिनिधि सभा सदस्य निर्वाचनको सुरक्षामा प्रहरी प्रधान कार्यालयले जिल्लाहरूमा थप मद्दत परिचालन गर्ने भएको छ । फागुन २१ मा हुने निर्वाचनका लागि १० हजार ९६७ मतदान स्थलको सुरक्षा सुनिश्चित गर्न केन्द्रबाट अतिरिक्त प्रहरी खटाइनेछ ।
प्रहरी प्रधान कार्यालयका एक उच्च अधिकृतका अनुसार करिब १३ हजार प्रहरी थप मद्दतको रूपमा परिचालन हुनेछन् । पहिलो चरणमा ४४ जना डीएसपी र ११० जना इन्स्पेक्टरलाई खटाइसकिएको छ भने थप १ सय जना डीएसपी र ४ सय इन्स्पेक्टर परिचालन गर्ने योजना बनाइएको छ । पहिलो चरणमा खटिएका अधिकृतहरू सोमबार फिल्डमा पुगेको प्रहरीले जनाएको छ ।
थप मद्दतका लागि खटिने प्रहरीहरू उपत्यका प्रहरी कार्यालय मातहतका गण, गुल्महरू र प्रहरी प्रधान कार्यालयबाट पठाइने छन् । मधेसका जिल्ला र लुम्बिनी प्रदेशका जिल्लामा अतिसंवेदनशील मतदान स्थल धेरै भएकाले त्यहाँ बढी प्रहरी खटाइनेछ। झापादेखि कैलालीसम्मका तराई क्षेत्रका जिल्लालाई चुनौतीपूर्ण मानिएको छ ।
मधेस प्रदेशमा सबैभन्दा धेरै १२ सय ४६ मतदानस्थल अति संवेदनशील सूचीमा परेका छन् । लुम्बिनीमा ४६२, सुदूरपश्चिममा ४८१, कोशी प्रदेशमा ४३९, बागमती प्रदेशका १० जिल्लामा ३५४, गण्डकी प्रदेशमा ३२८ र कर्णाली प्रदेशमा ३५८ मतदानस्थल अति संवेदनशील सूचीमा छन् ।
प्रहरी प्रधान कार्यालयका अनुसार एकीकृत सुरक्षा योजनाअनुसार निर्वाचनमा कुल ७३ हजार प्रहरी परिचालन हुनेछन् । यसमा १ लाख ३३ हजार ९८० जना निर्वाचन प्रहरी र १५ हजार ११० जना सशस्त्र प्रहरी बलका सदस्य समावेश हुनेछन् ।
निर्वाचन सुरक्षाका लागि प्रत्येक पालिकामा दुई जना इन्स्पेक्टर खटाइनेछन् । उनीहरूलाई सपोर्ट गर्न डीएसपीको कमाण्डमा रिजर्भ टिम तयार गरिएको छ, जसले आवश्यकता अनुसार दुई–तीन गाउँपालिका वा जिल्ला तहमा सुरक्षा सहयोग गर्नेछ । उपमहानगरपालिकामा ३ जना र महानगरपालिकामा ४ जना इन्स्पेक्टर परिचालन हुने योजना बनाइएको छ ।
अति संवेदनशील मतदान स्थलमा ३ जना प्रहरी र १० जना निर्वाचन प्रहरी खटाइनेछन् । मतदान स्थलमा थप केन्द्र भएमा २ जना प्रहरी र ४ जना निर्वाचन प्रहरी थप गरिनेछ ।
सशस्त्र प्रहरीका ३१ हजार सुरक्षाकर्मी दोस्रो घेरामा, ७९ हजार सेना तेस्रो घेरामा र राष्ट्रिय अनुसन्धान विभागका २ हजार सुरक्षाकर्मी सूचना सङ्कलनका लागि परिचालित हुनेछन् । केन्द्रीय सुरक्षा समितिबाट स्वीकृत एकीकृत सुरक्षा योजना अनुसार मतदान स्थल र केन्द्रको सुरक्षामा कुल ३ लाख १५ हजार सुरक्षाकर्मी परिचालन गरिनेछ ।
.jpg-2-1769587845.jpg)
