नेकपा (एमाले) का प्रतिनिधिसभा सदस्य पदका उम्मेदवार प्रदीप यादवले पर्सा निर्वाचन क्षेत्र नम्बर–१ अन्तर्गत वीरगञ्ज महानगरपालिका वडा नम्बर–१६ इनरवामा मङ्गलवार घरदैलो कार्यक्रम सम्पन्न गरेका छन् ।
घरदैलोका क्रममा उनले स्थानीय बासिन्दासँग प्रत्यक्ष भेटघाट गर्दै सूर्य चुनाव चिन्हमा मतदान गरी आफूलगायत एमालेका सम्पूर्ण उम्मेदवारहरूलाई विजयी बनाउन आग्रह गरे । यसै क्रममा इनरवा क्षेत्रमा स्थापना गरिएको आफ्नो सम्पर्क कार्यालयको औपचारिक उद्घाटन समेत गरिएको थियो ।
कार्यालय उद्घाटन कार्यक्रममा बोल्दै पूर्व मन्त्री समेत रहेका यादवले अबको आफ्नो मुख्य लडाइँ सङ्घीयता पूर्ण कार्यान्वयनका लागि हुने बताए । उनले देशमा सङ्घीयता स्थापना भएको झन्डै १० वर्ष पुग्न लाग्दा पनि पूर्ण रूपमा कार्यान्वयन हुन नसकेको उल्लेख गरे । प्रदेश र स्थानीय तहले आफ्नो अधिकार पूर्ण रूपमा प्रयोग गर्न नसकेको तथा कर्मचारीतन्त्रले सङ्घीयताको मर्मअनुसार काम नगरेको उनको भनाइ थियो ।
यादवले पछिल्लो समय देशमा विदेशी शक्तिहरूको प्रभाव बढ्दै गएको आरोप लगाउँदै नेपाललाई प्रयोगशाला बनाइएको दाबी गरे । उनले सङ्घीयता, लोकतन्त्र र गणतन्त्रको रक्षा गर्न केपी शर्मा ओली नेतृत्वको सरकार आवश्यक रहेको बताए ।
उनले नयाँ भनिएका दलका उम्मेदवारहरूको पृष्ठभूमि जाँच गर्न मतदातालाई आग्रह गर्दै काम गर्ने उम्मेदवारलाई चिनेर मतदान गर्न अनुरोध गरे। विगतमा कोरोना महामारी, खानेपानी सङ्कट र हैजा जस्ता सङ्कटका समयमा आफूले ज्यान जोखिममा राखेर जनताको साथमा उभिएको स्मरण गराउँदै उनले अन्य उम्मेदवारले समाजमा उल्लेखनीय योगदान दिन नसकेको आरोप लगाए ।
आफूलाई काम गर्न सक्ने र जनताको पक्षमा संसद्मा प्रभावकारी आवाज उठाउन सक्ने उम्मेदवारको रूपमा प्रस्तुत गर्दै यादवले यसपटक मतदाताले विकास र स्थायित्वका पक्षमा निर्णय गर्ने विश्वास व्यक्त गरे ।
