पर्सा निर्वाचन क्षेत्र नम्बर २ का राष्ट्रिय स्वतन्त्र पार्टी (रास्वपा) का प्रतिनिधिसभा सदस्य पदका उम्मेदवार सुशील कुमार कानुले वीरगञ्ज महानगरपालिका–२६ स्थित अठराहा सुगौली टोलमा घरदैलो कार्यक्रम सम्पन्न गरेका छन् ।
मतदातासँग अन्तरक्रिया गर्दै कानुले पार्टीको चुनाव चिन्ह “घण्टी”मा मतदान गर्न आग्रह गरे । उनले रास्वपाको करारपत्रअनुसार पाँच वर्षसम्म जनताको सेवामा समर्पित भएर काम गर्ने प्रतिबद्धता व्यक्त गरे ।
कार्यक्रममा उनले जनताको जीवनस्तर सुधार तथा भुइँतहका नागरिकको आवाज संसद्मा प्रभावकारी रूपमा उठाउने लक्ष्य रहेको बताए । विगतका निर्वाचित प्रतिनिधिहरूको कार्यसम्पादनप्रति असन्तुष्टि जनाउँदै उनले पर्सा–२ मा रोजगारी, शिक्षा, स्वास्थ्य र भौतिक पूर्वाधारमा उल्लेखनीय प्रगति नभएको टिप्पणी गरे ।
“यो क्षेत्र आज पनि दुई दशकअघिकै अवस्थामा छ,” कानुले भने, “निर्वाचित भएपछि यो अवस्थालाई परिवर्तन गर्नेछु ।” आफू जनतासँग प्रत्यक्ष काम गर्ने अनुभव भएको व्यक्ति भएको दाबी गर्दै उनले शिक्षा, स्वास्थ्य, कृषि र पूर्वाधार विकासलाई प्राथमिकतामा राखेर अघि बढ्ने बताए ।
कानुले आफ्नो प्रमुख चुनावी एजेन्डा सुशासन, आर्थिक विकास, शिक्षा, स्वास्थ्य र कृषिमा केन्द्रित रहेको उल्लेख गरे । उनले सरकारी सेवाहरूलाई डिजिटलाइज गरी पारदर्शी बनाउने, ई–गभर्नेन्स प्रणाली लागू गर्ने र भ्रष्टाचार नियन्त्रणमा कडाइ गर्ने प्रतिबद्धता जनाए। एकीकृत डिजिटल प्लेटफर्ममार्फत सेवा प्रवाह र नागरिकको डाटा सुरक्षालाई समेत प्राथमिकता दिने उनको योजना रहेको छ ।
आर्थिक सुधार, रोजगारी सिर्जना र लगानी आकर्षणलाई प्राथमिकता दिने उल्लेख गर्दै उनले स्टार्टअपहरूका लागि विशेष कोष स्थापना तथा विदेशी लगानी सहज बनाउने योजना सार्वजनिक गरे । यसबाट स्थानीय युवाहरू लाभान्वित हुने उनको अपेक्षा छ ।
घरदैलो कार्यक्रममा स्थानीय युवाहरू र ज्येष्ठ नागरिकको उल्लेखनीय सहभागिता रहेको थियो । सहभागीहरूले “परिवर्तनका लागि घण्टीमा मत हालौँ” भन्ने नारा लगाएका थिए ।
.jpg-2-1769587845.jpg)
