जनमत पार्टी का तर्फबाट पर्सा निर्वाचन क्षेत्र नं. १ का प्रतिनिधिसभा सदस्य उम्मेदवार ओमप्रकाश सरार्फले वीरगञ्ज महानगरपालिका वडा नं. १६ नगवा टोलमा सशक्त घरदैलो अभियान सम्पन्न गरेका छन् । जनकेन्द्रित चुनावी अभियानअन्तर्गत उनले स्थानीय बासिन्दासँग प्रत्यक्ष भेटघाट तथा संवाद गरेका हुन् ।
घरदैलो अभियानका क्रममा सरार्फ नगवा टोलका गल्ली–गल्लीमा पुगेर स्थानीयसँग खुला छलफलमा सहभागी भए । वर्षायाममा हुने डुबान, अव्यवस्थित नाला तथा ढल निकास, भित्री सडकको दुरवस्था, सडक बत्ती अभाव, खानेपानीको अनियमित आपूर्ति, फोहोर व्यवस्थापन, स्वास्थ्य तथा शिक्षासम्बन्धी चुनौती, बेरोजगारी र सीमावर्ती क्षेत्रसँग जोडिएका समस्याबारे स्थानीयले गुनासा राखेका थिए । सरार्फले ती विषयलाई प्राथमिकताका साथ समाधान गर्ने प्रतिबद्धता व्यक्त गरे ।
नगवा टोलमा वर्षायाममा घर–आँगन डुबानमा पर्ने समस्या दीर्घकालीन रूपमा समाधान गर्न व्यवस्थित ढल तथा नाला निर्माण अपरिहार्य रहेको स्थानीयको भनाइ थियो । सरार्फले संघीय, प्रदेश र स्थानीय तहबीच समन्वय गरी दीर्घकालीन पूर्वाधार विकास योजनामार्फत डुबान नियन्त्रणलाई प्राथमिकतामा राख्ने बताए । “विकास योजनाले नागरिकको दैनिकी सहज बनाउनु पर्छ, कागजमै सीमित हुनु हुँदैन,” उनले उल्लेख गरे ।
त्यसैगरी भित्री सडक स्तरोन्नति, सडक बत्ती विस्तार र सुरक्षित यातायात व्यवस्थापनमा आफू प्रतिबद्ध रहेको उनले स्पष्ट पारे। सीमावर्ती व्यापारिक सहर भएकाले ट्राफिक जाम र बजार व्यवस्थापन सुधार गर्न विशेष योजना ल्याउने उनले बताए । युवालाई स्वरोजगारतर्फ आकर्षित गर्न सीपमूलक तालिम, साना तथा मझौला उद्यम प्रवर्द्धन तथा लगानीमैत्री वातावरण निर्माण गर्ने प्रतिबद्धता पनि उनले जनाए ।
खानेपानी र सरसफाइको विषयमा स्वच्छ पानी प्रत्येक नागरिकको आधारभूत अधिकार भएकाले पानी आपूर्ति प्रणाली सुधार र नियमित अनुगमन आवश्यक रहेको उनको भनाइ थियो । फोहोर व्यवस्थापनलाई आधुनिक र दिगो बनाउन नगरस्तरीय ठोस योजना आवश्यक रहेकोमा उनले जोड दिए ।
स्वास्थ्य र शिक्षातर्फ बढ्दो जनसंख्या अनुसार सेवा विस्तार गर्नुपर्ने स्थानीयको मागप्रति सरार्फ सकारात्मक देखिए । उनले आधारभूत स्वास्थ्य सेवा सुदृढीकरण, आवश्यक जनशक्ति व्यवस्थापन तथा सामुदायिक विद्यालयको गुणस्तर सुधारमा पहल गर्ने प्रतिबद्धता व्यक्त गरे । “सुदृढ शिक्षा र स्वास्थ्य सेवा नै समृद्ध समाजको आधार हो,” उनले भने ।
घरदैलोका क्रममा स्थानीय मतदाताले सरार्फको सरल व्यवहार र प्रत्यक्ष संवाद शैलीको प्रशंसा गरेका थिए । विकास, सुशासन र पारदर्शितालाई मूल एजेन्डा बनाएको बताउँदै उनले पर्सा क्षेत्र नं. १ लाई नमुना निर्वाचन क्षेत्रका रूपमा विकास गर्ने लक्ष्य सार्वजनिक गरे । अभियानपछि वडा नं. १६ नगवा क्षेत्र हरन छापको किल्ला बन्दै गएको दाबी समर्थकहरूले गरेका छन् । चुनावी माहोल तातिँदै जाँदा सरार्फको सक्रिय अभियानले पर्सा क्षेत्र नं. १ मा नयाँ उत्साह र भरोसा सिर्जना गरेको बताइएको छ ।
