जनमत पार्टी का तर्फबाट पर्सा क्षेत्र नं. १ का प्रतिनिधिसभा सदस्य उम्मेदवार ओमप्रकाश सरार्फले आफ्नो चुनावी प्रचारप्रसार अभियानलाई तीव्र बनाएका छन् ।
उनले वीरगञ्ज महानगरपालिका वडा नं. २१ अन्तर्गत कुशवाहा टोल र तात्वा टोलमा व्यापक घरदैलो कार्यक्रम सम्पन्न गरेका हुन् । घरदैलो अभियानका क्रममा सरार्फले स्थानीय मतदातासँग प्रत्यक्ष भेटघाट तथा संवाद गर्दै उनीहरूको समस्या, सुझाव र अपेक्षाबारे जानकारी लिएका थिए ।
खानेपानीको चरम अभाव
स्थानीयवासीले खानेपानीको अभावलाई प्रमुख समस्या रूपमा उठाएका छन् । नियमित र शुद्ध खानेपानीको व्यवस्था नहुँदा महिलाहरू तथा बालबालिकाले टाढाबाट पानी बोकेर ल्याउनुपर्ने बाध्यता रहेको उनीहरूको गुनासो छ । कतिपय स्थानमा हातेधारा बिग्रिएको तथा पाइपलाइन जडान भए पनि पानी नआउने समस्या रहेको बताइएको छ । यसले स्वास्थ्यमा समेत नकारात्मक असर परेको स्थानीयको भनाइ छ ।
शिक्षा र स्वास्थ्यमा चुनौती
सरकारी विद्यालयमा शिक्षक अभाव, भौतिक पूर्वाधारको कमी तथा गुणस्तरीय शिक्षाको अभावले विद्यार्थी प्रभावित भएको अभिभावकहरूले बताएका छन् । आर्थिक रूपमा कमजोर परिवारले समेत निजी विद्यालय रोज्नुपर्ने बाध्यता रहेको उनीहरूको गुनासो छ । त्यस्तै, नजिकै सुविधा सम्पन्न स्वास्थ्य संस्था नहुँदा सामान्य उपचारका लागि समेत बजार क्षेत्र धाउनुपर्ने अवस्था रहेको स्थानीयले बताएका छन् । स्वास्थ्य चौकीमा औषधि, उपकरण र जनशक्तिको अभाव रहेको पनि उनीहरूको भनाइ छ ।
कृषि क्षेत्रमा समस्या
किसानहरूले पर्याप्त सिँचाइ सुविधा नहुँदा उत्पादन घटेको, मलखाद तथा बिउबिजन अभाव भएको र उत्पादनको उचित मूल्य नपाएको गुनासो गरेका छन् । बजार व्यवस्थापन कमजोर हुँदा किसान निराश बनेको उनीहरूको धारणा छ । कृषि क्षेत्रलाई सुदृढ बनाउन दीर्घकालीन र किसानमैत्री योजना आवश्यक रहेको उनीहरूले जोड दिएका छन् ।
सरार्फको प्रतिबद्धता
स्थानीयका गुनासा सुनेपछि उम्मेदवार सरार्फले विकासको आधार स्थानीय आवश्यकता र जनसहभागितामा निर्भर रहने बताएका छन् । उनले खानेपानी, शिक्षा, स्वास्थ्य र कृषि जस्ता आधारभूत क्षेत्रलाई प्राथमिकतामा राखेर योजनाबद्ध ढंगले काम गर्ने प्रतिबद्धता व्यक्त गरे ।
“जनताको विश्वास र साथ पाएर संसदमा पुगेपछि यहाँका समस्यालाई दीर्घकालीन र दिगो समाधानतर्फ लैजान पहल गर्ने,” उनले बताए ।
घरदैलो अभियानलाई प्रभावकारी बनाउन महिला टोलीसमेत परिचालन गरिएको जनाइएको छ । स्थानीय मतदाताले यसपटक परिणाममुखी काम गर्ने नेतृत्वलाई समर्थन गर्ने बताएका छन् । पर्सा क्षेत्र नं. १ मा सरार्फको घरदैलो अभियान दिनप्रतिदिन सशक्त बन्दै गएको पार्टी स्रोतले जनाएको छ ।
.jpg-2-1769587845.jpg)
