२१ फागुनमा हुने प्रतिनिधिसभा निर्वाचनलाई लक्षित गर्दै नेपाल प्रहरी ले सात प्रहरी अतिरिक्त महानिरीक्षक (एआईजी)लाई सातै प्रदेशमा खटाएको छ । निर्वाचन सुरक्षा चुस्त पार्न प्रहरी प्रधान कार्यालय तथा विभिन्न विभागमा कार्यरत एआईजीहरूलाई प्रदेश कमाण्डको जिम्मेवारी दिइएको हो। उनीहरूले निर्वाचन अवधिभर प्रदेशमै रहेर मातहतका जिल्लाहरूको सुरक्षा कमाण्ड गर्नेछन् ।
प्रदेशगत कमाण्ड व्यवस्था
कोशी प्रदेश
मानव स्रोत विभागका एआईजी राजन अधिकारीलाई कोशी प्रदेशमा खटाइएको छ । प्रदेश प्रहरी प्रमुख डीआईजी विनोद घिमिरे छन् । संवेदनशील मानिएको झापा जिल्लामा एसएसपी गोविन्द अधिकारीलाई खटाइएको छ, जसले झापा र इलामको कमाण्ड गर्नेछन् । झापाका जिल्ला प्रहरी प्रमुख एसपी बसुन्धरा खड्का हुन् ।
मधेश प्रदेश
प्रदेश समन्वय विभागका एआईजी डम्बर विकलाई मधेश प्रदेशमा पठाइएको छ । उनले आठै जिल्लाको अनुगमन तथा निर्देशन गर्नेछन् । प्रदेश प्रहरी प्रमुख डीआईजी गोविन्द थपलिया छन् । सर्लाही र रौतहटको कमाण्डका लागि एसएसपी सुरेश काफ्ले खटिएका छन् ।
बागमती प्रदेश
राष्ट्रिय प्रहरी प्रशिक्षण प्रतिष्ठानका एआईजी सिद्धिविक्रम शाहलाई बागमती प्रदेशको कमाण्ड दिइएको छ । प्रदेश प्रहरी प्रमुख डीआईजी दीपक रेग्मी छन् । दोलखामा एसपी नान्तिराज गुरुङ, काभ्रे र सिन्धुपाल्चोकमा विनोद सिलवाललाई कमाण्ड जिम्मेवारी दिइएको छ ।
गण्डकी प्रदेश
केन्द्रीय अनुसन्धान ब्युरो (सीआईबी)मा कार्यरत एआईजी डा. मनोज केसी गण्डकी प्रदेशमा खटिएका छन् । प्रदेश प्रहरी प्रमुख डीआईजी दीपेन्द्र जिसी हुन् । कास्की र स्याङ्जाको कमाण्ड जनार्दन जिसीले सम्हाल्नेछन् ।
लुम्बिनी प्रदेश
कार्य विभाग प्रमुख एआईजी उमा प्रसाद चतुर्वेदीलाई लुम्बिनी प्रदेशमा पठाइएको छ । प्रदेश प्रहरी प्रमुख भूपेन्द्र बहादुर खत्री छन् । रुपन्देही र कपिलवस्तुको कमाण्ड ऋषिराम कँडेललाई दिइएको छ ।
कर्णाली प्रदेश
अपराध अनुसन्धान विभागका एआईजी सुशील सिंह राठौर कर्णालीमा खटिएका छन् । प्रदेश प्रहरी प्रमुख जयराज सापकोटा हुन् ।
सुदूरपश्चिम प्रदेश
प्रशासन विभाग प्रमुख एआईजी हिमालय कुमार श्रेष्ठ सुदूरपश्चिम प्रदेशको कमाण्डमा छन् । प्रदेश प्रहरी प्रमुख ओमबहादुर राना छन् ।
उपत्यका र अतिरिक्त सुरक्षा
काठमाडौं उपत्यकाका तीन जिल्लाको कमाण्ड एआईजी ईश्वर कार्कीले गर्नेछन् । निर्वाचन सुरक्षाका लागि काठमाडौं उपत्यका प्रहरी कार्यालय, रानीपोखरीले एसएसपी रमेश बस्नेतको कमाण्डमा विशेष सेल गठन गरेको छ ।
प्रहरीका केन्द्रीय प्रवक्ता डीआईजी अविनारायण काफ्लेका अनुसार, प्रत्येक जिल्लामा कम्तीमा एसपी स्तरबाट निर्वाचन सुरक्षा कमाण्ड हुने व्यवस्था मिलाइएको छ । पहाडी जिल्लाहरूमा डीएसपीको सट्टा एसपी खटाइएको छ भने संवेदनशील जिल्लामा एसएसपी परिचालन गरिएको छ । कतिपय एसपी/एसएसपीलाई दुई जिल्लासम्मको कमाण्ड दिइएको छ ।
१२ हजार बढी अतिरिक्त टोली परिचालन
उपत्यकाबाट १२ हजार ७०० भन्दा बढी प्रहरी टोली देशभर खटिएका छन् । ट्राफिक, अपराध अनुसन्धान, ब्यूरोहरू लगायतका युनिटबाट पनि थप जनशक्ति परिचालन गरिएको छ । ट्राफिक प्रहरी निर्वाचन सुरक्षामा खटिँदा उपत्यकाको ट्राफिक व्यवस्थापन प्रभावित भएको बताइएको छ ।
साइबर र सीमा सुरक्षामा विशेष ध्यान
निर्वाचन अवधिमा साइबर चुनौती बढ्न सक्ने भन्दै प्रहरी प्रधान कार्यालयमा मनिटरिङ डेस्क स्थापना गरिएको छ । सामाजिक सञ्जाल मनिटरिङ, निर्वाचन आयोगमा साइबर डेस्क तथा साइबर ब्यूरोमार्फत निगरानी तीव्र पारिएको छ ।
सीमा नाकामा कडा निगरानी, शंकास्पद स्थानमा तालिमप्राप्त कुकुर परिचालन, र काउन्टरपार्ट निकायसँग समन्वय गरी आवश्यक परे सीमा नाका बन्द गर्ने तयारी गरिएको छ ।
हाल दैनिक जिल्ला सुरक्षा समितिको बैठक बसेर सुरक्षा विश्लेषण भइरहेको छ भने गृहमन्त्रालयमा केन्द्रीय सुरक्षा समितिले पनि दैनिक समीक्षा गर्दै आवश्यक रणनीति तय गरिरहेको छ ।
