पर्सा निर्वाचन क्षेत्र नम्बर १ मा प्रतिनिधिसभा सदस्य पदका लागि यसपटक कडा प्रतिस्पर्धा देखिएको छ । प्रदीप यादवको बलियो व्यक्तित्व, अघि बढाएका विकास निर्माणका काम र वीरगंजमा ल्याएका मेगा प्रोजेक्टका कारण अन्य दलका उम्मेदवारहरू दबाबमा परेको विश्लेषकहरूले आकलन गरेका छन् ।
स्थानीय मतदाताहरूका अनुसार निर्वाचन सम्पन्न हुन अब एक सातामात्र बाँकी रहँदा एमाले उम्मेदवार यादव अग्रस्थानमा रहेका छन्, कांग्रेस दोस्रो र राष्ट्रिय स्वतन्त्र पार्टी (रास्वपा) तेस्रो स्थानमा रहने अनुमान गरिएको छ । राजनीतिक विश्लेषकहरूका अनुसार कुनै अप्रत्याशित परिवर्तन नभए अन्य उम्मेदवारहरूको अवस्था कमजोर हुन सक्ने देखिन्छ ।
देशभर नयाँ अनुहारप्रतिको आकर्षण बढिरहेको सन्दर्भमा पनि पर्सा–१ मा प्रदीप यादवको विगतको कार्यसम्पादन र जनतासँगको प्रत्यक्ष सम्बन्धले उनलाई बलियो उम्मेदवारका रूपमा स्थापित गरेको बताइन्छ । उनी जनतासँग ‘डाइरेक्ट कनेक्सन’ राख्ने नेताका रूपमा परिचित छन्, जसका कारण प्रतिस्पर्धी उम्मेदवारहरूलाई चुनौती थपिएको छ ।
केही जेन–जेड पुस्ताका युवा मतदाताहरूका अनुसार पर्सा–१ मा एमाले र कांग्रेसबीच मुख्य प्रतिस्पर्धा देखिए पनि रास्वपाले पनि उल्लेख्य मत ल्याउन सक्ने सम्भावना छ । विशेषगरी स्वतन्त्र धारका मतदाताहरू तथा ‘नयाँ राजनीति’को पक्षधर युवाहरू रास्वपातर्फ आकर्षित हुन सक्ने आकलन गरिएको छ ।
रास्वपाबाट पर्सा–१ मा हरि पन्त उम्मेदवार रहेका छन् । उनी आन्तरिक रूपमा आफ्नो जनाधार विस्तार गर्दैछन्। हार–जित जे भए पनि एमाले, कांग्रेस र रास्वपाबीच त्रिपक्षीय प्रतिस्पर्धा हुने संकेत देखिएको छ ।
वीरगंज महानगरपालिका तथा पर्साका अन्य पालिकाहरूमा पानीको संकट उत्पन्न हुँदा तत्कालीन खानेपानी मन्त्रीसमेत रहेका प्रदीप यादवले देखाएको सक्रियता र दीर्घकालीन समाधानका लागि अघि सारेका मेगा प्रोजेक्टहरूले उनलाई जनतामाझ लोकप्रिय बनाएको समर्थकहरूले दाबी गरेका छन् ।
त्यस्तै सडक तथा पूर्वाधार विकास, धार्मिक क्षेत्रको संरक्षण, सार्वजनिक धर्मशाला तथा विवाह मण्डप निर्माणमा गरेको पहल र लगानीका कारण पनि उनले जनसमर्थन बढाएको बताइन्छ । उनका समर्थकहरूले पर्सा–१ मा विकासप्रेमी र प्रभावशाली नेताका रूपमा यादव अग्रस्थानमा रहेको बताएका छन् ।
यद्यपि जानकारहरूले यसपटक पर्सा–१ को निर्वाचन ‘महायुद्ध’ सरह हुने देखिएको बताएका छन्, जहाँ अन्तिम परिणामका लागि अन्तिम समयसम्म प्रतीक्षा गर्नुपर्ने अवस्था रहनेछ ।
-1772177803.jpg)
.jpg-2-1769587845.jpg)
