संयुक्त अरब इमिरेट्स (यूएई) स्थित नेपाली दूतावासले त्यहाँ बसोबास गर्ने सम्पूर्ण नेपाली समुदायलाई सामाजिक सञ्जालमा अपुष्ट वा भ्रामक सामग्री नफैलाउन आग्रह गरेको छ ।
दूतावासले जारी गरेको ‘एड्भाइजरी–२’ अनुसार, अज्ञात स्रोतबाट प्राप्त सूचना, हल्ला वा आधिकारिक पुष्टि नभएका सामग्री प्रकाशन तथा प्रसारण नगर्न सबैलाई अनुरोध गरिएको छ । यसले सुरक्षा अवस्थाबारे अन्योल र भ्रम सिर्जना हुन सक्ने भएकाले सचेत रहनुपर्ने चेतावनी दिइएको छ ।
साथै, दूतावासले परिस्थितिसम्बन्धी फोटो तथा भिडियो खिचेर पोस्ट गर्दा पनि जिम्मेवार व्यवहार अपनाउन अपिल गरेको छ । एड्भाइजरीमा उल्लेख छ कि यूएईका सम्बन्धित निकायहरूले यस्ता गतिविधि कानुनअनुसार दण्डनीय हुने चेतावनी जारी गरिसकेको छ ।
दूतावासले नेपाली नागरिकहरूलाई स्थानीय कानुनको पालना गर्न र अफवाह फैलाउने कार्यबाट टाढा रहन आग्रह गरेको छ । त्यहाँ रहेका नेपालीहरूले विकसित परिस्थितिबारे सही र आधिकारिक जानकारीका लागि मात्र यूएई सरकारका आधिकारिक निकायका वेबसाइट र सूचनामार्फत अपडेट लिनु पर्ने बताइएको छ ।
यसअघि पनि दूतावासले पहिलो एड्भाइजरी जारी गर्दै अनावश्यक यात्रा नगर्न र सुरक्षा मापदण्ड अपनाउन आग्रह गरेको थियो ।
