लहानस्थित प्रादेशिक अस्पतालमा कार्यरत डा. बृजेन्द्रकुमार साहको सरुवा भएको दुई महिना नाघ्दा पनि उनी अझै नयाँ खटाइएको स्थानमा हाजिर नभएको पाइएको छ।
मधेश प्रदेशको स्वास्थ्य तथा जनसंख्या मन्त्रालयले आठौं तहका मेडिकल अधिकृत साहलाई गत माघ २ गते सर्लाहीको मलंगवा प्रादेशिक अस्पतालमा सरुवा गरेको थियो। तर, लहानकै बासिन्दा डा. साह आफ्नै निजी क्लिनिक ‘जीवन रक्षा अल्ट्रासाउन्ड’मा बढी समय दिन थालेका कारण मन्त्रालयले उनको सरुवा गरेको थियो।
सरुवा भएपनि कानुन अनुसार २१ दिनभित्र नयाँ कार्यस्थलमा हाजिर हुनुपर्नेमा साहले अहिलेसम्म लहानमै बस्न थालेका छन्। स्थानीयवासीले सरकारी अस्पतालमा समय नदिने र आफ्नो निजी क्लिनिकमा बढी समय दिने गरेको गुनासो गर्दै आएका थिए।
डा. साहले भने, “मेरो घर लहानमै छ र मेरो आवश्यकता पनि यहीँ छ, त्यसैले सरुवा कार्यान्वयन गर्न गएका छैन। निजी क्लिनिकमा बढी समय दिएको कुरा सत्य हो, तर त्यसको कारण पनि छ।”
मन्त्रालयले अहिलेसम्म सरुवा कार्यान्वयनमा कुनै सक्रियता नदेखाएको पाइएको छ। स्वास्थ्य सेवा क्षेत्रमा यस प्रकारको अटेरले सेवा उपलब्धतामा समस्या उत्पन्न हुने स्थानीय बताउँछन्।
