उच्च अदालत जनकपुरको अस्थायी इजलास वीरगंजले वीरगंजस्थित हरि खेतान बहुमुखी क्याम्पस र हरि खेतान माध्यमिक विद्यालय एउटै भवनमा सञ्चालन नगर्न आदेश दिएको छ ।
केही समयदेखि दुवै शिक्षण संस्था एउटै भवनमा सञ्चालन हुँदै आएको थियो । यसविरुद्ध परेको रिट निवेदनमा सुनुवाई गर्दै अदालतले क्याम्पस र विद्यालय फरक–फरक भवनमा सञ्चालन गर्न निर्देशन दिएको हो । अदालतको आदेशअनुसार अब विद्यालय र क्याम्पस फरक–फरक भवनमा मात्र होइन, फरक–फरक कानुनी संरचनाअन्तर्गत सञ्चालन हुनुपर्नेछ । यस निर्णयले विगतदेखि उठ्दै आएको व्यवस्थापन र कानुनी विवादलाई औपचारिक रूपमा टुंग्याउने संकेत गरेको छ ।
नेपालको शिक्षा ऐन २०२८ ले माध्यमिक विद्यालय र विश्वविद्यालय अन्तर्गतका क्याम्पसलाई पृथक कानुनी संरचनामा सञ्चालन गर्नुपर्ने स्पष्ट व्यवस्था गरेको छ । साथै, त्रिभुवन विश्वविद्यालय कार्यकारी परिषद्ले जारी गरेको सम्बन्धन सम्बन्धी विनियम २०७३ ले पनि एउटै भवनमा विद्यालय र क्याम्पस सञ्चालन गर्न नहुने प्रष्ट उल्लेख गरेको छ ।
कानुनी प्रावधानअनुसार क्याम्पस प्रमुख र विद्यालयका प्रधानाध्यापक फरक–फरक व्यक्ति हुनुपर्ने भए पनि, यहाँ क्याम्पस प्रमुखले विद्यालयको प्रशासनिक कार्यमा हस्तक्षेप गरेको आरोप लाग्दै आएको थियो । सञ्चालक समितिले पटक–पटक क्याम्पस प्रमुखलाई शिक्षा ऐनअनुसार विद्यालय सञ्चालन गर्न आग्रह गरे पनि त्यसको बेवास्ता गरिएको थियो ।
अदालतको आदेशपछि अब दुवै संस्था कानुनी ढाँचाअनुसार स्वतन्त्र रूपमा सञ्चालन हुने अपेक्षा गरिएको छ ।
