पर्सा । नेपाल सरकारको एक सय कार्ययोजना कार्यान्वयनको अनुगमन तथा जनताका समस्या बुझ्न पर्सा क्षेत्र नम्बर १ का सांसद हरि पन्त र क्षेत्र नम्बर २ का सांसद सुशील कुमार कानु ले जिल्ला प्रशासन कार्यालय पर्सामा स्थलगत निरीक्षण गरेका छन् ।
जिल्ला प्रशासन कार्यालय पुगेर सांसदद्वयले संयुक्त रूपमा सेवा प्रवाहको अवस्थाबारे अनुगमन गर्दै कार्यालयका कर्मचारीलाई सेवा अझ छिटो, सहज र प्रभावकारी बनाउन निर्देशन दिएका हुन् । उनीहरूले सेवाग्राहीलाई लामो समय लाइनमा बस्नुपर्ने अवस्था, अनावश्यक झन्झट तथा ढिलासुस्तीको गुनासोबारे प्रत्यक्ष रूपमा जानकारी लिएका थिए ।
अनुगमनका क्रममा नागरिकता, राहदानी, राष्ट्रिय परिचयपत्र, सिफारिसलगायत सेवाहरूमा देखिएको भीड व्यवस्थापन, समयमै सेवा उपलब्ध गराउने व्यवस्था र सूचना प्रणालीलाई थप व्यवस्थित बनाउनुपर्ने आवश्यकता औंल्याइएको थियो । सांसदहरूले सेवाग्राहीमैत्री वातावरण सिर्जना गर्न, अनलाइन प्रणालीको प्रभावकारी प्रयोग गर्न र कर्मचारीहरूको जिम्मेवारीबोध बढाउन पनि सुझाव दिएका छन् ।
सांसद पन्तले जनताको सहज पहुँच र छिटो सेवा प्रवाह सरकारको प्राथमिकता भएको उल्लेख गर्दै कार्यान्वयनमा ढिलाइ नगर्न आग्रह गरे। त्यस्तै सांसद कानुले सरकारी कार्यालयप्रतिको विश्वास बढाउन पारदर्शिता र जवाफदेहिता अत्यावश्यक रहेको बताए ।
अनुगमनपछि कार्यालय प्रशासनले सेवा सुधारका लागि आवश्यक पहल गर्ने प्रतिबद्धता जनाएको छ। सांसदद्वयले आगामी दिनमा समेत नियमित रूपमा अनुगमन जारी राख्ने बताएका छन् ।
