क्यान्सर एक ज्यान जोखिममा पार्ने रोग हो । “क्यान्सर” शब्द सुन्नासाथ धेरै मानिसमा डर उत्पन्न हुन्छ ।
तर आधुनिक चिकित्सा विज्ञानको विकाससँगै केही प्रकारका क्यान्सर अब पहिलेभन्दा धेरै हदसम्म नियन्त्रण वा उपचार गर्न सकिने चिकित्सकहरू बताउँछन् । कोलोन क्यान्सर, जसलाई नेपालीमा ठूलो आन्द्राको क्यान्सर भनिन्छ, यसका चार चरण हुन्छन् । पहिलो र दोस्रो चरणमा यो क्यान्सर पूर्ण रूपमा निको पार्ने सम्भावना बढी हुन्छ भने तेस्रो र चौथो चरणमा उपचार तुलनात्मक रूपमा जटिल हुने गर्छ ।
भारतको शारदा अस्पतालका वरिष्ठ क्यान्सर विशेषज्ञ डा. अनिल ठकवानीका अनुसार स्टेज–३ कोलोन क्यान्सर पनि पूर्ण रूपमा असम्भव भने होइन । समयमै उपचार सुरु गरियो र शरीरले उपचारलाई राम्रोसँग प्रतिक्रिया दियो भने बिरामी लामो समयसम्म स्वस्थ जीवन बाँच्न सक्छ ।
स्टेज–३ क्यान्सरमा उपचार सम्भव छ ?
विशेषज्ञका अनुसार धेरै बिरामीलाई क्यान्सर स्टेज–३ मा पुगिसकेपछि मात्र थाहा हुन्छ । तर यस चरणमा पनि उपचार विकल्पहरू उपलब्ध हुन्छन् । आधुनिक उपचार पद्धतिहरूले क्यान्सर कोशिकालाई नियन्त्रण गर्न र केही अवस्थामा हटाउन मद्दत गर्छन् ।
प्रमुख उपचार विधि
१. टार्गेटेड थेरापी
यस विधिमा क्यान्सर कोशिकाको वृद्धि रोक्ने औषधि प्रयोग गरिन्छ । यसले कोशिकाको वृद्धि संकेतलाई अवरुद्ध गरी क्यान्सर विस्तार हुनबाट रोक्छ ।
२. इम्युनोथेरापी
यस उपचारमा शरीरको प्रतिरक्षा प्रणालीलाई मजबुत बनाइन्छ । कमजोर भएको इम्युन सिस्टमलाई सक्रिय बनाएर क्यान्सर कोशिकाविरुद्ध लड्न सक्षम बनाइन्छ ।
उपचारको सफलता कति हुन्छ?
चिकित्सकहरूका अनुसार स्टेज–३ कोलोन क्यान्सरको उपचार सफलता दर विभिन्न कारकमा निर्भर गर्छ । क्यान्सर कति फैलिएको छ, बिरामीको स्वास्थ्य अवस्था कस्तो छ र शरीरले उपचारलाई कस्तो प्रतिक्रिया दिइरहेको छ भन्ने कुराले ठूलो भूमिका खेल्छ ।
यदि समयमै सही उपचार सुरु गरियो भने स्टेज–३ क्यान्सर पनि नियन्त्रणमा ल्याउन सकिने र जीवनकाल उल्लेखनीय रूपमा बढाउन सकिने विशेषज्ञहरूको भनाइ छ ।
