चिकित्सा शिक्षा सुधारका अभियन्ता प्रा.डा. गोविन्द केसीको स्वास्थ्य अवस्था नाजुक बनेपछि उनलाई इलामबाट हेलिकोप्टरमार्फत काठमाडौं ल्याइएको छ । इलाममा २५औँ पटक आमरण अनशनमा बसेका डा. केसीलाई थप उपचारका लागि त्रिवि शिक्षण अस्पताल (टिचिङ) मा भर्ना गरिएको छ ।
अनशनको पाँचौँ दिनदेखि नै उनको स्वास्थ्यमा लगातार जटिलता देखिन थालेको थियो । श्वासप्रश्वासमा समेत कठिनाइ भएपछि आइतबार रातिदेखि उनलाई अक्सिजन दिएर उपचार सुरु गरिएको थियो ।
स्वास्थ्य अवस्था थप जोखिमपूर्ण बन्दै गएपछि उपचारमा संलग्न चिकित्सकहरूले सुविधासम्पन्न अस्पतालमा स्थानान्तरण गर्न सिफारिस गरेका थिए ।
इलाम अस्पतालका निमित्त मेडिकल सुपरिटेन्डेन्ट डा. अमिताभ ठाकुरका अनुसार संघीय तथा प्रदेश स्वास्थ्य मन्त्रालय र जिल्ला प्रशासन कार्यालयको समन्वयमा डा. केसीलाई काठमाडौं पठाइएको हो ।
सोमबार बिहान प्राप्त स्वास्थ्य विवरणअनुसार डा. केसीको रक्तचाप १००/६० र पल्स ९० देखि १०० को बीचमा रहेको थियो ।
डा. केसीले गेटामा आवश्यक पूर्वाधारबिना एमबीबीएस तथा नर्सिङ कार्यक्रम सञ्चालन गर्न दिइएको अनुमति खारेज गर्नुपर्ने, चिकित्सा शिक्षा आयोग र विश्वविद्यालयका पदाधिकारी नियुक्तिमा देखिएको स्वार्थको द्वन्द्वबारे निष्पक्ष छानबिन गर्नुपर्ने, गेटा अस्पताल पूर्ण क्षमतामा सञ्चालन गर्नुपर्ने तथा यसअघि सरकारसँग भएका सहमति कार्यान्वयन गर्नुपर्ने लगायतका ६ बुँदे माग राख्दै आमरण अनशन सुरु गरेका हुन् ।
उनका माग सम्बोधनका लागि सम्बन्धित निकायले आवश्यक पहल गर्नुपर्ने मागसमेत उठिरहेको छ । हाल डा. केसीको त्रिवि शिक्षण अस्पतालमा उपचार भइरहेको छ ।
