आम जनता पार्टीका अध्यक्ष तथा पूर्वमन्त्री प्रभु साहले वर्तमान सरकार र नेतृत्वले विधि–प्रक्रिया मिचेर शासन गर्न खोजेको आरोप लगाएका छन् ।
आइतबार सिराहाको गोलबाजारमा पार्टीले आयोजना गरेको भेटघाट कार्यक्रमलाई सम्बोधन गर्दै अध्यक्ष साहले प्रधानमन्त्री बालेन शाह ले बल प्रयोग र विधि उल्लङ्घनमार्फत लामो समय शासन गर्ने संकेत देखिएको भन्दै यस्तो प्रवृत्ति नेपाली जनताका लागि अस्वीकार्य हुने चेतावनी दिए ।
उनले संसद् छलेर अध्यादेशमार्फत शासन चलाइनु संसदीय लोकतन्त्रको उपहास भएको टिप्पणी गर्दै जननिर्वाचित सर्वोच्च थलो संसद्को सर्वोच्चता कायम राख्नुपर्ने सुझाव दिए। विगतमा केपी ओली नेतृत्वको सरकारको अभ्यासलाई स्मरण गर्दै उनले अहिलेको नेतृत्वलाई पनि सचेत हुन आग्रह गरे ।
साहले पुराना दलहरू कांग्रेस, एमाले र नेकपाप्रति जनताको असन्तुष्टिबाट रास्वपाले अभूतपूर्व जनमत पाएको उल्लेख गर्दै वर्तमान सरकारले उक्त जनमतको सही सदुपयोग गर्न नसकेको आरोप लगाए । उनका अनुसार बालेन शाह नेतृत्वप्रति प्रारम्भमै देखिएको उत्साह अहिले निराशामा बदलिन थालेको छ। “हतारमा गरिएका निर्णयले सरकार नै संकटमा पर्न सक्छ,” उनले भने ।
त्यस्तै, उनले सुकुमबासी बस्ती हटाउने क्रममा नेपाली सेना समेत परिचालन गरिएको विषयमा पनि आपत्ति जनाउँदै यस्तो कदम उचित नभएको टिप्पणी गरे ।
