उच्च अदालत जनकपुरधाम अस्थायी इजलास वीरगंजको अभिलेख शाखामा कार्यरत कर्मचारी राधेश्याम कुशवाहालाई जिल्ला प्रशासन कार्यालय पर्साले ५ दिन कैद र ५ हजार रुपैयाँ जरिवानाको सजाय सुनाएको छ ।
केही दिनअघि कुशवाहाले आफ्नै गाउँका ७२ वर्षीय वृद्धलाई कुटपिट गरी अभद्र व्यवहार गरेका थिए । पीडित वृद्धले दिएको जाहेरीको आधारमा इलाका प्रहरी कार्यालय पोखरीयाले कुशवाहालाई नियन्त्रणमा लिएर आवश्यक अनुसन्धानपछि सरकारी वकिलको कार्यालयमा मुद्दा दर्ता गराएको थियो ।
जिल्ला प्रशासन कार्यालय पर्साका प्रमुख जिल्ला अधिकारी दिनेश कुमार भुसालले १८ गते कुशवाहालाई अभद्र व्यवहारको दोषी ठहर गर्दै ५ दिनको कैद र ५ हजार रुपैयाँ जरिवानाको फैसला गरेका हुन् । कुटपिटमा संलग्न तीन अन्य व्यक्तिलाई भने ६ हजार ५ सय रुपैयाँ जरिवाना गराएको छ ।
स्रोतका अनुसार, कुशवाहा उच्च अदालतका कर्मचारी भएको भन्दै गाउँघरमा धाकधम्की दिँदै आएका थिए ।
