नेपाल प्रहरीका दुई प्रहरी नायव उपरीक्षक (डीएसपी) सहित १ सय ४९ जना प्रहरी अधिकृतको काज तथा सरुवा गरिएको छ ।
नेपाल प्रहरी प्रधान कार्यालयका प्रहरी उपरीक्षक निरन्जन दत्त भट्टले शुक्रबार सूचना जारी गर्दै प्रहरी महानिरीक्षकको निर्णयअनुसार सरुवा गरिएको जानकारी दिनुभएको हो । निर्णयअनुसार सम्बन्धित प्रहरी अधिकृतहरूले जेठ महिनादेखिको तलब, भत्ता तथा अन्य सुविधा सरुवा भएको दरबन्दीबाट नै पाउने व्यवस्था गरिएको छ ।
सरुवा सूचीअनुसार जिल्ला प्रहरी कार्यालय बाराका प्रवक्ता एवं प्रहरी नायव उपरीक्षक विजय राज पण्डितको मधेश प्रदेश प्रहरी कार्यालय, प्रहरी नायव महानिरीक्षकको सचिवालयमा सरुवा भएको छ । उहाँको स्थानमा काठमाडौं उपत्यका सशस्त्र प्रहरी गण नम्बर–२ महाराजगञ्जबाट प्रहरी नायव उपरीक्षक मीनबहादुर घले बारामा आउने भएका छन् ।
त्यस्तै, नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय पथलैयामा कार्यरत प्रहरी नायव उपरीक्षक वकिल कुमार सिंहको प्रहरी वृत्त सातदोबाटो, काठमाडौंमा सरुवा गरिएको छ । उहाँको स्थानमा काठमाडौं उपत्यका ट्राफिक प्रहरी कार्यालय रामशाहपथबाट प्रहरी नायव उपरीक्षक नवराज न्यौपाने पथलैयामा आउने भएका छन् ।
नेपाल प्रहरीले संगठनको कार्यसम्पादनलाई थप प्रभावकारी बनाउन नियमित प्रक्रिया अनुसार काज तथा सरुवा गरिएको जनाएको छ ।
