४८३ परिवारलाई भोगचलन गर्दैआएकाे जग्गाको जग्गाधनी प्रमाणपुर्जा (लालपुर्जा) वितरण गरिएको छ ।
धनुषाको मिथिला बिहारी नगरपालिकामा साबिक मिथिलेश्वर निकास गाविस वडा नम्बर ६, ७, ८ र ९ मा पुस्तौंदेखि गाउँब्लक जमिन भोगचलन गर्दै आएका परिवारलाई शनिबार लालपुर्जा वितरण गरिएको हो । नापी कार्यालय धनुषाको २ नम्बर नापी टोलीका प्रमुख सियाराम साहका अनुसार गाउँब्लक जग्गाको नापनक्सा तथा दर्ता प्रक्रिया पूरा गरी प्रमाणपुर्जा वितरण गरिएको हो । कार्यालयमा प्राप्त ६५८ निवेदनमध्ये हालसम्म ४८३ जनालाई लालपुर्जा वितरण गरिएको उनले जानकारी दिए ।
उनका अनुसार बाँकी निवेदनको पनि आवश्यक प्रक्रिया पूरा गरी छिट्टै लालपुर्जा वितरण गरिनेछ । लालपुर्जा प्राप्त भएपछि स्थानीयको जीवनस्तरमा सकारात्मक परिवर्तन आउने विश्वास समेत व्यक्त गरिएको छ । वडाध्यक्ष सुरेन्द्रकुमार मण्डलले पुस्तौँदेखि भोगचलन गर्दै आएको जग्गामा कानुनी स्वामित्व प्राप्त गर्नु लामो संघर्ष र सरकारी प्रयासको परिणाम भएको बताए । लालपुर्जा प्राप्त भएपछि स्थानीयवासीले आफ्नो पुर्ख्यौली जग्गामा कानुनी अधिकार प्राप्त भएको भन्दै खुसी व्यक्त गरेका छन् ।
कार्यक्रममा नगरपालिकाका प्रमुख प्रशासकीय अधिकृत उपेन्द्र न्यौपाने, कार्यपालिका सदस्य रामउदगार दास, सर्वेक्षक राजिवप्रसाद साह, अमिन श्यामराज पण्डित, सञ्जय यादवलगायत कर्मचारी तथा विभिन्न राजनीतिक दलका प्रतिनिधिहरूको उपस्थिति रहेको थियो ।
धनुषा, मिथिला बिहारी, लालपुर्जा, गाउँब्लक, जग्गाधनी प्रमाणपत्र, नेपाल समाचार, स्थानीय समाचार, भूमि व्यवस्था, जनजीवन, सरकारी कार्यक्रम
