राष्ट्रिय परीक्षा बोर्ड ले कक्षा १२ को नतिजा आगामी असार १० गतेभित्रै सार्वजनिक गर्ने तयारी गरेको छ ।
सरकारले परीक्षा सम्पन्न भएको ४५ दिनभित्र नतिजा प्रकाशन गर्न निर्देशन दिएपछि बोर्डले सोही समयसीमाभित्र वा सम्भव भएसम्म त्यसअघि नै नतिजा सार्वजनिक गर्न तीव्र गतिमा काम गरिरहेको जनाएको छ । परीक्षा नियन्त्रक कृष्णप्रसाद शर्मा का अनुसार उत्तरपुस्तिका परीक्षण तथा सम्परीक्षणको काम सम्पन्न भइसकेको छ । हाल विद्यार्थीहरूको प्राप्तांक इन्ट्री र म्याचिङको कार्य भइरहेको छ ।
नतिजा समयमै प्रकाशन गर्न कर्मचारीहरू बिदाको दिनमा समेत खटिएका छन् भने बिहान र बेलुकासमेत अतिरिक्त समय काम भइरहेको बोर्डले जनाएको छ । यसअघि कक्षा १२ को नतिजा सार्वजनिक गर्न कम्तीमा ७० दिन लाग्ने गरेकोमा यस वर्ष ४५ दिनभित्र नतिजा निकाल्ने लक्ष्य राखिएको छ । त्यसका लागि देशभर ४८ वटा उत्तरपुस्तिका परीक्षण केन्द्र थप गरी मूल्यांकन कार्यलाई तीव्र बनाइएको बोर्डले जनाएको छ ।
गत वैशाख १४ गतेदेखि सञ्चालन भएको यस वर्षको कक्षा १२ परीक्षामा कुल ४ लाख १८ हजार ८ जना परीक्षार्थी सहभागी भएका थिए । तीमध्ये नियमिततर्फ ३ लाख ३२ हजार १७८ र आंशिकतर्फ ८५ हजार ८३० विद्यार्थी सहभागी भएका थिए ।
यसैगरी, एभरेस्ट स्कुल बाट समेत ३९ जना विद्यार्थी परीक्षामा सहभागी भएको बोर्डले जनाएको छ ।
