सिरहाको गोलबजार नगरपालिकाका तत्कालीन नगर प्रमुख देवनाथ साहु तेली र उपप्रमुख रेशमकुमारी थापासहित सात जनाविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ ।
नगरपालिकाको आर्थिक वर्ष २०७७/७८ र २०७८/७९ मा पशु हाटबजार, बाख्रा हाटबजार र गुदरी हाटबजारको ठेक्कासम्बन्धी अनियमितता तथा राजस्व हिनामिनाको आरोपमा आयोगले मंगलबार विशेष अदालत, काठमाडौंमा आरोपपत्र दायर गरेको हो ।
अख्तियारका अनुसार मुद्दा दायर गरिएकामा तत्कालीन नगर प्रमुख तेली, उपप्रमुख थापा, तत्कालीन प्रमुख प्रशासकीय अधिकृतद्वय श्रीधर केसी र अनन्तकुमार पौड्याल, तत्कालीन निमित्त प्रमुख प्रशासकीय अधिकृत रामनारायण महतो, तत्कालीन राजस्व शाखा प्रमुख दिनेशकुमार सहनी र हाटबजार ठेकेदार वीरेन्द्रकुमार यादव रहेका छन् ।
उनीहरूमाथि कुल १ करोड ६० लाख ११ हजार ४३१ रुपैयाँ हिनामिना गरेको आरोप लगाइएको छ । आयोगले तत्कालीन नगर प्रमुख तेली, उपप्रमुख थापा, तत्कालीन प्रमुख प्रशासकीय अधिकृत केसी, राजस्व शाखा प्रमुख सहनी र ठेकेदार यादवविरुद्ध १ करोड ६० लाख ४६ हजार ३४४ रुपैयाँ बिगो मागदाबी गरेको छ ।
त्यसैगरी, तत्कालीन प्रमुख प्रशासकीय अधिकृत पौड्याल र तत्कालीन निमित्त प्रमुख प्रशासकीय अधिकृत महतोविरुद्ध १ करोड ३३ लाख ११ हजार ४३१ रुपैयाँ बिगो मागदाबी गरिएको अख्तियारले जनाएको छ ।
आयोगका अनुसार नगरपालिकाको आर्थिक ऐन तथा प्रचलित कानुनविपरीत २७ लाख ३४ हजार ९१३ रुपैयाँ छुट दिने निर्णय गरिएको थियो । त्यस्तै, पशु हाटबजार, बाख्रा हाटबजार र गुदरी हाटबजारको ठेक्का प्रतिस्पर्धाबिना सोझै वीरेन्द्रकुमार यादवलाई दिइएको आरोप छ ।
ठेक्काबापतको रकम असुल गरी नगरपालिकाको सञ्चित कोषमा दाखिला गर्नुपर्नेमा त्यसो नगरी १ करोड ३३ लाख ११ हजार ४३१ रुपैयाँ हिनामिना गरिएको आरोपपत्रमा उल्लेख छ ।
यस प्रकरणमा अख्तियारले प्रतिवादी बनाइएका सातै जनाविरुद्ध कानुनबमोजिम कारबाही र बिगो असुलउपरको माग गर्दै विशेष अदालतमा मुद्दा दायर गरेको हो ।
