चरा तथा पन्छीमा लाग्ने अतिसङ्क्रामक भाइरल रोग ‘बर्ड फ्लू’ देशका ११ जिल्लाका ८२ स्थानमा फैलिएको छ ।
पशु सेवा विभागले विशेषगरी काठमाडौं उपत्यकाका जिल्लाहरूमा उच्च सतर्कता अपनाउन आग्रह गरेको छ । पशु सेवा विभागका महानिर्देशक डा. उमेश दाहालका अनुसार गत चैत ४ गते मोरङमा पहिलो पटक देखिएको बर्ड फ्लू हालसम्म झापा, मोरङ, सुनसरी, महोत्तरी, बारा, चितवन, नवलपरासी, काठमाडौं, भक्तपुर, ललितपुर र काभ्रेका विभिन्न स्थानमा फैलिएको छ ।
विभागका अनुसार हालसम्म रोगबाट प्रभावित पाँच लाख ६९ हजार ८५८ पन्छी नष्ट गरिएको छ । साथै नौ लाख ८९ हजार ३१३ वटा अण्डा र एक लाख ९५ हजार ४८५ किलोग्राम दाना पनि नष्ट गरिएको छ ।
डा. दाहालले कोशी प्रदेशमा रोग नियन्त्रणका लागि एक महिनासम्म पन्छी ओसारपसारमा रोक लगाइएको भए पनि अवस्था सुधार भएसँगै प्रतिबन्ध खुकुलो बनाइएको जानकारी दिए । पशु क्वारेन्टाइन कार्यालयमार्फत उच्च सतर्कता अपनाउँदै गस्ती परिचालन गरी अवैध रूपमा पैठारी गरिएका शङ्कास्पद पन्छीहरू समेत नष्ट गरिएको उनले बताए ।
उनका अनुसार झापा, मोरङ, सुनसरी, महोत्तरी, बारा, चितवन र नवलपरासीमा रोग नियन्त्रणमा आइसकेको छ । तर काठमाडौं, भक्तपुर, ललितपुर तथा काभ्रेका केही स्थानमा अझै बर्ड फ्लूको प्रकोप देखिएकाले विशेष निगरानी जारी राखिएको छ ।
सावधानी अपनाउन विभागको आग्रह
विभागले उपमहानिर्देशकको नेतृत्वमा बर्ड फ्लू रोग नियन्त्रण कक्ष स्थापना गरी सङ्घ, प्रदेश तथा स्थानीय तहसँगको समन्वयमा नियन्त्रण अभियान सञ्चालन गरिरहेको जनाएको छ ।
विभागले पन्छीपालक किसानलाई फार्ममा जैविक सुरक्षा मापदण्ड कडाइका साथ पालना गर्न आग्रह गरेको छ । अण्डा राख्ने पुराना कागजी क्रेट पुनः प्रयोग नगर्न, ढुवानीका साधनलाई निसङ्क्रमण गरेर मात्र फार्मभित्र प्रवेश गराउन तथा कागलगायत जङ्गली पन्छीहरू घरपालुवा पन्छीको सम्पर्कमा आउन नदिने व्यवस्था मिलाउन सुझाव दिइएको छ ।
यस्तै पन्छी तथा पन्छीजन्य उत्पादन ओसारपसार गर्दा अनिवार्य रूपमा भेटेरिनरी स्वास्थ्य प्रमाणपत्र लिएर मात्र ढुवानी गर्न विभागले आग्रह गरेको छ ।
