वीरगंज महानगरपालिकाले आर्थिक वर्ष २०८३/०८४ का लागि ४ अर्ब ४२ करोड ३४ लाख ९६ हजार रुपैयाँ बराबरको बजेट सार्वजनिक गरेको छ । महानगरले बुधबार नगरसभामार्फत आगामी आर्थिक वर्षको बजेट प्रस्तुत गरेको हो ।
महानगर प्रमुख राजेशमानसिंह भ्रष्टाचारसम्बन्धी मुद्दामा निलम्बनमा परेपछि उपप्रमुख इम्तियाज आलम कार्यवाहक प्रमुखको जिम्मेवारीमा रहेका छन् । सोही कारण बुधबार आयोजित नगरसभामा वडा नम्बर ४ का वडाध्यक्ष जगतप्रसाद कानुले बजेट प्रस्तुत गरेका हुन् ।
प्रस्तुत बजेटअनुसार चालु खर्चतर्फ २ अर्ब ४० करोड ३४ लाख ८५ हजार रुपैयाँ विनियोजन गरिएको छ भने पुँजीगत खर्चतर्फ १ अर्ब ९६ करोड ९९ लाख ८४ हजार रुपैयाँ छुट्याइएको छ ।
महानगरले बजेटका लागि विभिन्न स्रोतबाट आम्दानीको व्यवस्था गरेको जनाएको छ । सङ्घीय सरकारबाट प्राप्त हुने वित्तीय हस्तान्तरणअन्तर्गत १ अर्ब ९८ करोड २९ लाख रुपैयाँ, राजस्व बाँडफाँडबाट २४ करोड ६८ लाख ८३ हजार रुपैयाँ, प्रदेश अन्तरसरकारी वित्तीय हस्तान्तरणबाट ५ करोड २८ लाख २८ हजार रुपैयाँ तथा प्रदेश राजस्व बाँडफाँडबाट १ करोड ७६ लाख १४ हजार रुपैयाँ प्राप्त हुने अनुमान गरिएको छ ।
त्यसैगरी घरजग्गा रजिस्ट्रेसन शुल्कबाट ४५ करोड रुपैयाँ, आन्तरिक राजस्वबाट १ अर्ब ४८ करोड रुपैयाँ, गत आर्थिक वर्षको मौज्दातबाट ४ करोड ६९ लाख ४४ हजार रुपैयाँ तथा नगर विकास कोषबाट १५ करोड रुपैयाँ व्यहोर्ने लक्ष्य महानगरले राखेको छ ।
महानगरपालिकाले पूर्वाधार विकास, शिक्षा, स्वास्थ्य, सरसफाइ तथा सेवा प्रवाहलाई प्रभावकारी बनाउने उद्देश्यसहित बजेट विनियोजन गरिएको जनाएको छ ।
