वीरगंज महानगरपालिकाको कृषि तथा पशुपन्छी व्यवसाय प्रवर्द्धन शाखाको आयोजनामा २३औँ राष्ट्रिय धान दिवस तथा दही–चिउरा खाने कार्यक्रम भव्य रूपमा सम्पन्न भएको छ ।
यस वर्ष “जलवायुमैत्री प्रविधि, धानमा आत्मनिर्भरता र समृद्धि” भन्ने मूल नाराका साथ दिवस मनाइएको हो । कार्यक्रममा वीरगंज महानगरपालिकाका कार्यवाहक नगर प्रमुख इम्तियाज आलम प्रमुख अतिथिका रूपमा सहभागी भएका थिए । खेतमै पुगेर धान रोपाइँ गर्दै कार्यक्रमको शुभारम्भ गरेका आलमले जलवायु परिवर्तनका कारण कृषि क्षेत्रमा देखिएका चुनौतीको सामना गर्न आधुनिक तथा जलवायुमैत्री प्रविधिको प्रयोग अपरिहार्य रहेको बताए ।
उनले कृषिमा प्रविधिको प्रयोग बढाएर धान उत्पादनमा वृद्धि गर्नुपर्नेमा जोड दिँदै किसानलाई आवश्यक प्रविधि, तालिम तथा सेवाको पहुँच विस्तार गर्न महानगरपालिका प्रतिबद्ध रहेको बताए। नगर क्षेत्रलाई कृषि उत्पादनमा आत्मनिर्भर बनाउने उद्देश्यका साथ विभिन्न कृषि प्रवर्द्धन कार्यक्रम सञ्चालन भइरहेको पनि उनले जानकारी दिए ।
स्थानीय तहमा कृषिको आधुनिकीकरणलाई प्रोत्साहन गर्ने उद्देश्यले आयोजना गरिएको कार्यक्रममा कृषक, जनप्रतिनिधि, कृषि विज्ञ तथा महानगरपालिकाका कर्मचारीहरूको उत्साहजनक सहभागिता रहेको थियो । सहभागीहरूले परम्पराअनुसार सामूहिक रूपमा धान रोपाइँ गर्नुका साथै दही–चिउरा खाएर असार १५ को मौलिक संस्कृतिलाई संरक्षण गर्दै एकआपसमा शुभकामना आदानप्रदान गरेका थिए ।
राष्ट्रिय धान दिवसले नेपाली कृषि, किसानको श्रम र मौलिक संस्कृतिको सम्मान गर्दै कृषि उत्पादन वृद्धि तथा आत्मनिर्भरताको सन्देश प्रवाह गर्ने विश्वास गरिएको छ ।
