बाराको जीतपुरसिमरा उपमहानगरपालिका क्षेत्र हुँदै जाने पूर्व–पश्चिम राजमार्ग तथा त्यससँग जोडिएका भित्री सडकहरू पछिल्लो समय सवारी दुर्घटनाका दृष्टिले अत्यन्त जोखिमपूर्ण बन्दै गएका छन् ।
पछिल्लो एक साताभित्र भएका दुई छुट्टाछुट्टै दुर्घटनामा चार जनाले ज्यान गुमाएका छन् भने अन्य दुई जना घाइते भएका छन् । लगातार बढ्दो मानवीय क्षतिले यस क्षेत्रको सडक सुरक्षामाथि गम्भीर प्रश्न उठाएको छ ।
सोमबार दिउँसो सिमरा विमानस्थल नजिक डुमरवाना–सिमरा भित्री सडकखण्डमा भएको दुर्घटनामा पर्साको वीरगञ्ज महानगरपालिका–२९ निवासी १७ वर्षीय लक्की सराफको मृत्यु भएको छ । इलाका प्रहरी कार्यालय सिमराका अनुसार डुमरवानाबाट सिमरातर्फ आउँदै गरेको ना २८ प ५८५५ नम्बरको स्कुटरले अगाडि गुडिरहेको प्र.२–०३–००१ त ३७७३ नम्बरको ट्र्याक्टरलाई ओभरटेक गर्ने क्रममा विपरीत दिशाबाट आइरहेको म.प्र.०३–०४१ प २२७४ नम्बरको मोटरसाइकलसँग ठोक्किएको थियो ।
ठक्करपछि स्कुटर ट्र्याक्टरमुनि पस्दा दुर्घटना भएको प्रहरीले जनाएको छ । गम्भीर घाइते भएका लक्की सराफलाई सिमरास्थित सीटी स्टार अस्पतालमा प्रारम्भिक उपचारपछि परवानीपुरस्थित न्युरो अस्पताल लगिएको थियो । उपचारकै क्रममा उनको मृत्यु भएको हो । स्कुटरमा पछाडि सवार १७ वर्षीय दिलसाद देवान सामान्य उपचारपछि डिस्चार्ज भएका छन् भने मोटरसाइकल चालक जीतपुरसिमरा–२३ निवासी २९ वर्षीय रइफुल आलम अन्सारी घाइते भई थप उपचारका लागि वीरगञ्जस्थित हेल्थ केयर अस्पतालमा रिफर गरिएको प्रहरीले जनाएको छ ।
दुर्घटनामा संलग्न ट्र्याक्टर, स्कुटर र मोटरसाइकललाई प्रहरीले नियन्त्रणमा लिएको छ भने ट्र्याक्टर चालक जीतपुरसिमरा–४ औराहाका ७० वर्षीय शिवराज चौधरीलाई अनुसन्धानका लागि नियन्त्रणमा राखिएको छ । यसअघि असार ८ गते जीतपुरसिमरा–९ छातापिप्रास्थित वीरगञ्ज–पथलैया सडकखण्डमा भएको अर्को दुर्घटनाले तीन जनाको ज्यान लिएको थियो ।
जितपुरबाट वीरगञ्जतर्फ जाँदै गरेको बा ६८ प ७४९१ नम्बरको मोटरसाइकलले सडक पार गर्दै गरेका करिब ३५ वर्षीय एक पैदलयात्रीलाई ठक्कर दिएको थियो । दुर्घटनामा पैदलयात्रीसहित मोटरसाइकलमा सवार काठमाडौं टोखा निवासी २० वर्षीय डिजेन जोशी र जीतपुरसिमरा–१ पथलैया निवासी २० वर्षीय सभ्य अधिकारी गम्भीर घाइते भएका थिए । उपचारका क्रममा तीनै जनाको मृत्यु भएको थियो ।
जिल्ला प्रहरी कार्यालय बाराका सूचना अधिकारी तथा प्रहरी नायब उपरीक्षक मीनबहादुर घलेका अनुसार पछिल्ला दिनमा विशेषगरी पूर्व–पश्चिम राजमार्ग र त्यससँग जोडिएका भित्री सडकमा तीव्र गति, असुरक्षित ओभरटेक, ट्राफिक नियमको बेवास्ता तथा पैदलयात्रीको असावधानीका कारण दुर्घटना बढ्दै गएको छ । उनले चालकलाई गति नियन्त्रणमा राख्न, सुरक्षित रूपमा ओभरटेक गर्न तथा ट्राफिक नियमको पूर्ण पालना गर्न आग्रह गरेका छन् ।
लगातार भएका दुर्घटनापछि स्थानीयवासीले पनि गम्भीर चिन्ता व्यक्त गरेका छन् । उनीहरूले जीतपुरसिमरा क्षेत्रमा प्रभावकारी ट्राफिक व्यवस्थापन, सवारीको गति नियन्त्रण, पैदलयात्रीका लागि सुरक्षित क्रसिङ, सडक सुरक्षाका पूर्वाधार विस्तार तथा नियमित निगरानी बढाउन सम्बन्धित निकायसँग माग गरेका छन् । स्थानीयका अनुसार समयमै प्रभावकारी कदम चालिएन भने यो क्षेत्र दुर्घटनाको उच्च जोखिमयुक्त सडकका रूपमा अझ चिनिन सक्ने अवस्था देखिएको छ ।
