फेरान टोरेसको अतिरिक्त समयमा गरेको निर्णायक गोलको मद्दतमा स्पेनले साविक विजेता अर्जेन्टिनालाई १–० ले पराजित गर्दै फिफा विश्वकप २०२६ को उपाधि जितेको छ ।
न्यु जर्सीस्थित मेटलाइफ स्टेडियममा सम्पन्न रोमाञ्चक फाइनलमा खेलको १०६औँ मिनेटमा टोरेसले गरेको एकमात्र गोल नै स्पेनलाई दोस्रो पटक विश्व च्याम्पियन बनाउन पर्याप्त बन्यो ।
स्पेनले पहिलो पटक सन् २०१० मा नेदरल्यान्ड्सलाई अतिरिक्त समयमा हराउँदै विश्वकप जितेको थियो । त्यसको १६ वर्ष र आठ दिनपछि फेरि अतिरिक्त समयमै गोल गर्दै स्पेनले दोस्रो विश्वकप उपाधि आफ्नो नाममा लेखाएको हो । खेलभर स्पेनले बल नियन्त्रण र आक्रमणमा पूर्ण वर्चस्व कायम राख्यो । स्पेनले कुल २० वटा प्रहार गर्दा अर्जेन्टिनाले निर्धारित समयभर एउटै पनि प्रहार लक्ष्यतर्फ गर्न सकेन ।
अर्जेन्टिनाको चुनौती खेलको अन्त्यतिर थप कठिन बन्यो । इन्जुरी समयअघि एन्जो फर्नान्डेजले पाउ कुबार्सीमाथि गरेको कडा ट्याकलका कारण रेफ्री स्लाभ्को भिन्चिचले दोस्रो पहेँलो कार्ड देखाउँदै उनलाई रातो कार्डसहित मैदानबाट बाहिर पठाए। त्यसपछि १० खेलाडीमा सीमित अर्जेन्टिनामाथि स्पेनले निरन्तर दबाब बनाइरह्यो ।
अतिरिक्त समयको दोस्रो हाफ सुरु भएको मात्र ३७ सेकेन्डमा स्पेनले निर्णायक गोल गर्यो। पेड्रो पोरोले दिएको उत्कृष्ट क्रसलाई निको विलियम्सले हेडमार्फत फेरान टोरेसतर्फ पास मिलाइदिए । टोरेसले शक्तिशाली हाफ–भली प्रहार गर्दै अर्जेन्टिनाका गोलकिपर एमिलियानो मार्टिनेजलाई निरुपाय बनाए ।
प्रतियोगितामा टोरेसको यो पहिलो गोल भए पनि त्यसैले स्पेनलाई विश्व च्याम्पियन बनायो । यस जितसँगै स्पेनले थुप्रै ऐतिहासिक उपलब्धि हासिल गरेको छ । स्पेन दोस्रो पटक विश्वकप उपाधि जित्ने राष्ट्र बनेको छ । साथै, युरोपियन च्याम्पियनसिप र विश्वकप लगातार जित्ने इतिहास दोहोर्याउने पहिलो तथा एकमात्र टोली पनि बनेको छ । स्पेनले यस विश्वकपमा केवल एक गोल मात्र व्यहोर्दै उपाधि जित्ने कीर्तिमानसमेत बनाएको छ ।
उता, ३९ वर्षीय लियोनल मेसीको लगातार दोस्रो विश्वकप जित्ने सपना भने अधुरै रह्यो । प्रतियोगिताभर आठ गोल र चार असिस्ट गरेका आठ पटकका बालोन डी'ओर विजेता मेसी स्पेनको सशक्त रक्षापङ्क्तिबीच फाइनलमा प्रभाव जमाउन सकेनन् ।
सन् २०२१ र २०२४ को कोपा अमेरिका तथा २०२२ को विश्वकप जितेको अर्जेन्टिनाले यसपटक भने प्रमुख अन्तर्राष्ट्रिय प्रतियोगितामा पहिलो पटक उपाधिविहीन बन्नुपरेको छ । यद्यपि अर्जेन्टिनाका गोलकिपर एमिलियानो मार्टिनेजले ११ उत्कृष्ट बचाउ गर्दै टोलीलाई खेलमा टिकाइराखेका थिए । तर, उनले अर्जेन्टिनालाई ब्राजिलपछि लगातार दुई विश्वकप जित्ने पहिलो टोली बनाउने सपना पूरा गर्न सकेनन् ।
स्पेनका मुख्य प्रशिक्षक लुइस डे ला फुएन्टे ६५ वर्षको उमेरमा विश्वकप जिताउने सबैभन्दा पाका प्रशिक्षक बने । खेल सकिएलगत्तै दुवै टोलीका केही खेलाडीबीच सामान्य धकेलाधकेलको अवस्था सिर्जना भए पनि स्थिति छिट्टै सामान्य बनाइएको थियो । त्यसपछि स्पेनका खेलाडीहरूले उपविजेता पदक ग्रहण गर्न मञ्चतर्फ गइरहेका अर्जेन्टिनी खेलाडीका लागि ‘गार्ड अफ अनर’ बनाएर उत्कृष्ट खेलभावना प्रदर्शन गरेका थिए ।
