फ्रान्सका स्टार फरवार्ड किलियन एम्बाप्पेले फिफा विश्वकप २०२६ मा सर्वाधिक गोलकर्ता बन्दै लगातार दोस्रो पटक गोल्डेन बुट जितेर नयाँ इतिहास रचेका छन् । प्रतियोगिताभर आठ खेलमा १० गोल गरेका एम्बाप्पे विश्वकप इतिहासमा लगातार दुई संस्करणमा गोल्डेन बुट जित्ने पहिलो खेलाडी बने ।
एम्बाप्पेले सन् २०२२ को कतार विश्वकपमा पनि आठ गोल गर्दै गोल्डेन बुट जितेका थिए । यसपटक १० गोलसहित उनले अर्जेन्टिनाका कप्तान लियोनल मेसीलाई पछि पार्दै फेरि सर्वाधिक गोलकर्ताको सम्मान हात पारे ।
२७ वर्षीय एम्बाप्पे सन् १९७० मा पश्चिम जर्मनीका गर्ड मुलरपछि एउटै विश्वकपमा १० वा त्योभन्दा बढी गोल गर्ने पहिलो खेलाडी पनि बने । यसअघि सन् १९५८ मा फ्रान्सका जस्ट फन्टेनले १३ गोल र सन् १९५४ मा हंगेरीका सान्दोर कोचिसले ११ गोल गरेका थिए ।
यस उपलब्धिसँगै एम्बाप्पे पुरुष विश्वकप इतिहासकै सर्वाधिक गोलकर्ता पनि बनेका छन् । उनका नाममा अब कुल २२ विश्वकप गोल पुगेका छन्, जुन लियोनल मेसीको भन्दा एक गोल बढी हो । प्रतियोगितामा एम्बाप्पेले समूह चरणमा सेनेगल र इराकविरुद्ध दुई–दुई गोल गरेका थिए । त्यसपछि अन्तिम ३२ मा स्विडेन, अन्तिम १६ मा पाराग्वेविरुद्ध पेनाल्टीमार्फत तथा क्वाटरफाइनलमा मोरक्कोविरुद्ध पनि गोल गरेका थिए ।
अर्जेन्टिनाका कप्तान लियोनल मेसीसँग फाइनलमा ह्याट्रिक गर्दै एम्बाप्पेलाई उछिन्ने अवसर थियो । तर स्पेनसँग १–० ले पराजित भएको फाइनलमा मेसी गोल गर्न असफल भए । उनले प्रतियोगिता आठ खेलमा आठ गोल र चार असिस्टसहित समाप्त गरे ।
इंग्ल्यान्डका जुड बेलिङ्घम र नर्वेका एर्लिङ हालान्डले समान सात गोल गरे भने फ्रान्सका उस्मान डेम्बेले तथा इंग्ल्यान्डका कप्तान ह्यारी केनले समान छ–छ गोल गरे ।
व्यक्तिगत पुरस्कारमा स्पेनको वर्चस्व
विश्व च्याम्पियन बनेको स्पेनले अधिकांश व्यक्तिगत पुरस्कार पनि आफ्नो नाममा पार्न सफल भयो ।
रोड्री बने उत्कृष्ट खेलाडी
स्पेनका कप्तान तथा मिडफिल्डर रोड्री प्रतियोगिताकै उत्कृष्ट खेलाडी घोषित हुँदै गोल्डेन बल जित्न सफल भए । न्यु जर्सीस्थित मेटलाइफ स्टेडियममा सम्पन्न फाइनलपछि फिफा अध्यक्ष जियानी इन्फान्टिनोले उनलाई पुरस्कार प्रदान गरेका थिए ।
३० वर्षीय रोड्रीको करिअरको यो तेस्रो ठूलो व्यक्तिगत सम्मान हो । उनले यसअघि सन् २०२३ मा बालोन डी'ओर तथा युरो २०२४ मा प्रतियोगिताकै उत्कृष्ट खेलाडीको पुरस्कार जितेका थिए । अर्जेन्टिनाका लियोनल मेसीले सिल्भर बल तथा फ्रान्सका किलियन एम्बाप्पेले ब्रन्ज बल प्राप्त गरे ।
उनाइ सिमोन उत्कृष्ट गोलकिपर
स्पेनका गोलकिपर उनाइ सिमोन प्रतियोगिताका उत्कृष्ट गोलकिपर घोषित हुँदै गोल्डेन ग्लोभ जित्न सफल भए ।
सिमोनले आठ खेलमा केवल एक गोल मात्र बेहोरे भने सात खेलमा क्लिनसिट राखे । क्वाटरफाइनलमा बेल्जियमका चार्ल्स डे केटेलारेले मात्र उनलाई गोल गर्न सकेका थिए । २९ वर्षीय सिमोनले प्रतियोगिताभर उत्कृष्ट प्रदर्शन गर्दै स्पेनलाई दोस्रो विश्वकप उपाधि दिलाउन महत्त्वपूर्ण भूमिका खेले ।
पाउ कुबार्सी उत्कृष्ट युवा खेलाडी
स्पेनका १९ वर्षीय सेन्टर–ब्याक पाउ कुबार्सी प्रतियोगिताका उत्कृष्ट युवा खेलाडी घोषित भए ।
बार्सिलोनाका डिफेन्डर कुबार्सीले स्पेनको रक्षापंक्तिको नेतृत्व गर्दै टोलीलाई प्रतियोगिताभर केवल एक गोल मात्र खान दिए । अर्जेन्टिनाविरुद्धको फाइनलमा समेत स्पेनले विपक्षीलाई लक्ष्यतर्फ एउटा पनि प्रभावकारी प्रहार गर्न दिएको थिएन ।
कुबार्सीले प्रतियोगिताभर प्रत्येक मिनेट खेल्दै स्पेनलाई सन् २०१० पछि दोस्रो विश्वकप उपाधि दिलाउन महत्त्वपूर्ण योगदान पुर्याए ।
