ट्रकको ठक्करबाट साइकल यात्रुको मृत्यु, चालकसहित ट्रक नियन्त्रणमा

प्रदेश

Home
प्रदेश
ट्रकको ठक्करबाट साइकल यात्रुको मृत्यु, चालकसहित ट्रक नियन्त्रणमा

ट्रकको ठक्करबाट साइकल यात्रुको मृत्यु, चालकसहित ट्रक नियन्त्रणमा

वीरगंज सिटी सोमबार, साउन १८, २०८३

महेन्द्र राजमार्गअन्तर्गत सर्लाहीको हरिवन नगरपालिका–४ स्थित गणेश चोकमा सोमबार बिहान ट्रकको ठक्करबाट एक जना साइकल यात्रुको मृत्यु भएको छ

।

मृत्यु हुनेमा हरिपुर नगरपालिका–५, लक्ष्मीपुर निवासी ५० वर्षीय पञ्चलाल चौधरी रहेका छन् । उनी मजदुरीका लागि सासापुरस्थित गेला गाउँ जाँदै गर्दा बिहान करिब ७ बजे दुर्घटनामा परेका हुन् । प्रहरीका अनुसार चौधरी साइकलमा सवार भएर सडक पार गर्न खोजिरहेका बेला मधेश प्रदेश ०३–००२ ख ११९४ नम्बरको ट्रकले ठक्कर दिएको थियो । प्रत्यक्षदर्शीका अनुसार उनी सडक किनारमा रोकिएको बसको अगाडिबाट सडक पार गर्ने क्रममा पछाडिबाट तीव्र गतिमा आएको ट्रकले किचेको हो ।

ट्रकको ठक्करबाट चौधरीको घटनास्थलमै मृत्यु भएको प्रहरीले जनाएको छ। मृतकको शव पोस्टमार्टमका लागि प्रादेशिक अस्पताल मलङ्गवामा पठाइएको छ ।

दुर्घटनापछि फरार भएको ट्रक र चालकलाई बागमती क्षेत्रबाट इलाका प्रहरी कार्यालय कर्मैयाको टोलीले नियन्त्रणमा लिएको छ । ट्रक र चालकलाई थप अनुसन्धान तथा कानुनी कारबाहीका लागि इलाका प्रहरी कार्यालय हरिवनमा ल्याइएको प्रहरी निरीक्षक चन्द्रकान्त अधिकारीले जानकारी दिएका छन् ।