बारा जिल्लाको जितपुरसिमरा उपमहानगरपालिका–२३ स्थित भलुही चौकमा मोटरसाइकलले साइकललाई ठक्कर दिँदा एक १२ वर्षीय बालकको मृत्यु भएको छ ।
प्रहरीका अनुसार सोमबार राति प्रदेश २–०३–००२ प १११९ नम्बरको मोटरसाइकलले साइकललाई ठक्कर दिएको हो । दुर्घटनामा साइकल चालक पर्साको वीरगंज महानगरपालिका–३२ निवासी ३२ वर्षीय राजेश महतो र साइकलको पछाडि सवार उनका १२ वर्षीय छोरा कनाई महतो घाइते भएका थिए ।
घाइते दुवैलाई तत्काल उपचारका लागि परवानीपुरस्थित एल.एस. न्युरो अस्पताल लगिएको थियो। उपचारकै क्रममा बालक कनाई महतोको सोमबार राति मृत्यु भएको प्रहरीले जनाएको छ ।
दुर्घटनामा घाइते राजेश महतोको सोही अस्पतालमा उपचार भइरहेको छ। घटनाबारे प्रहरीले थप अनुसन्धान गरिरहेको जनाएको छ ।
