बारामा करको दायरा विस्तार र आर्थिक गतिविधिमा आएको सुधारसँगै आन्तरिक राजस्व सङ्कलनमा उल्लेख्य वृद्धि भएको छ ।
आन्तरिक राजस्व कार्यालय सिमराले आर्थिक वर्ष २०८२/८३ मा १७ अर्ब ८१ करोड ६७ लाख ५८ हजार रुपैयाँ राजस्व सङ्कलन गरेको छ । यो रकम अघिल्लो आर्थिक वर्ष २०८१/८२ मा सङ्कलन भएको १५ अर्ब २२ करोड ७७ लाख ६४ हजार रुपैयाँको तुलनामा १७ प्रतिशतले बढी हो ।
कार्यालयका प्रमुख दिनेश पाण्डेका अनुसार सरकारले तोकेको २१ अर्ब ४ करोड ४४ लाख ८६ हजार रुपैयाँ राजस्व सङ्कलन लक्ष्यको तुलनामा ८५ प्रतिशत प्रगति हासिल भएको छ ।
गत आवमा आयकरतर्फ सबैभन्दा बढी वृद्धि देखिएको छ । आयकर सङ्कलन १०४.७ प्रतिशतले बढेर १ अर्ब ७४ करोड २२ लाख ३१ हजार रुपैयाँ पुगेको कार्यालयले जनाएको छ । यस्तै मूल्य अभिवृद्धि कर (भ्याट) तर्फ ४१.४६ प्रतिशत वृद्धि भई १ अर्ब ५२ करोड ८८ लाख ८ हजार रुपैयाँ सङ्कलन भएको छ ।
कुल राजस्व सङ्कलनमा सबैभन्दा ठूलो हिस्सा अन्तःशुल्कको रहेको छ। अन्तःशुल्कतर्फ मात्रै ११ अर्ब ६६ करोड २० लाख ४७ हजार रुपैयाँ राजस्व उठेको छ ।
कार्यालयका अनुसार कर प्रशासनको पहुँच विस्तारसँगै करदाता सङ्ख्या पनि बढेको छ । गत आवमा दर्ता भएका कुल करदाताको सङ्ख्या १०.२ प्रतिशतले वृद्धि भई ९३ हजार १ सय ९ पुगेको छ ।
यसैगरी व्यक्तिगत स्थायी लेखा नम्बर (प्यान) लिनेको सङ्ख्या ६४ हजार ६ सय पुगेको छ । व्यावसायिक गतिविधिमा सुधार र कर प्रणालीको विस्तारका कारण राजस्व सङ्कलन तथा करदाताको दायरा विस्तार भएको कार्यालयले जनाएको छ ।
