धनुषाको धनौजी गाउँपालिकाका तत्कालीन प्रमुख प्रशासकीय अधिकृत सावनकुमार चौधरीसहित १० जनाविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ। आयोगले बिहीबार विशेष अदालत, काठमाडौंमा उनीहरूविरुद्ध आरोपपत्र दायर गरेको हो। आरोपपत्रमा तत्कालीन प्रमुख प्रशासकीय अधिकृत चौधरी, लेखापाल राधेश्याम राय, खरिदार अरुणकुमार यादव, तत्कालीन सि।अ।हे।व। उमेर साह र तत्कालीन शिक्षा शाखा प्रमुख अनिलकुमार साहुविरुद्ध भ्रष्टाचार गरेको आरोप लगाइएको छ।
अख्तियारका अनुसार धनौजी गाउँपालिकाको गौरदाहादेखि लखौरीसम्म सडक निर्माणसम्बन्धी ठेक्कामा बोलपत्र आह्वान तथा बोलपत्रको आशयको सूचना प्रकाशित नगरेको पाइएको छ। त्यस्तै, निर्माणस्थलमा काम नै नगरी झुट्टा प्राविधिक बिल, नापी किताब तथा कार्यसम्पन्न प्रतिवेदन तयार गरी भुक्तानी दिएको आरोप उनीहरूमाथि छ।
आयोगले तत्कालीन प्रमुख प्रशासकीय अधिकृत चौधरी र लेखापाल रायविरुद्ध जनही तथा संयुक्त रूपमा २६ लाख ६४ हजार ६२४ रुपैयाँ बिगो मागदाबी गरेको छ। त्यस्तै, खरिदार यादव, सि।अ।हे।व। साह र शिक्षा शाखा प्रमुख साहुविरुद्ध २४ लाख १५ हजार १२० रुपैयाँ बिगो मागदाबी गरिएको छ। उनीहरूविरुद्ध जनही २४ लाख १५ हजार १२० रुपैयाँ बिगो मागदाबी गरिएको आयोगले जनाएको छ।
