नेपाल कम्युनिस्ट पार्टी ९नेकपा०का संयोजक पुष्पकमल दाहाल ‘प्रचण्ड’ले मुलुक अहिले राष्ट्रिय स्वाधीनताको हिसाबले गम्भीर संकटबाट गुज्रिरहेको दाबी गरेका छन् बिहीबार सिरहाको मिर्चैयामा आयोजित पार्टी कार्यक्रममा बोल्दै प्रचण्डले संविधान, लोकतान्त्रिक अधिकार र मुलुकको राजनीतिक भविष्यसमेत चुनौतीमा परेको बताएका हुन्। उनले गत वर्ष भदौ २३ र २४ गते भएको आन्दोलनपछि देशको राजनीतिक परिस्थिति झनै जटिल बनेको जिकिर गरे। उनका अनुसार पछिल्लो घटनाक्रमले नेपाल राष्ट्रको अस्तित्व र भविष्यबारे समेत नागरिकमा चिन्ता बढाएको छ।
प्रचण्डले देशमा पुनः अर्को राजनीतिक दुर्घटना हुन सक्ने आशंका बढिरहेको भन्दै नेता तथा कार्यकर्तालाई वर्तमान परिस्थितिको गम्भीर समीक्षा गर्न आग्रह गरे।
उनले भदौ २४ पछि संविधानको मर्मविपरीत सरकार गठन गरिएको र संसद् विघटनसमेत गलत परिस्थितिमा भएको आरोप लगाए। नेपालको राजनीतिक निर्णयमा बाह्य शक्तिको प्रभाव बढ्दै गएको दाबी गर्दै उनले देशको निर्णय गर्ने अधिकार नेपाली जनतामै कायम हुनुपर्नेमा जोड दिए। ‘नेपाल नेपालीकै हातमा छ’ भन्ने अवस्था नरहेको दाबी गर्दै प्रचण्डले राष्ट्रिय स्वाधीनता र जनताको अधिकार पुनःस्थापित गर्न व्यापक राजनीतिक मोर्चा तथा आन्दोलन आवश्यक रहेको बताए। संविधानको अवस्थाबारे टिप्पणी गर्दै उनले त्यसलाई ‘भेन्टिलेटरमा राखिएको बिरामी’सँग तुलना गरे। संविधान, लोकतन्त्र, संघीयता, न्याय र सुशासनको संरक्षण अहिलेको प्रमुख चुनौती भएको उनको भनाइ थियो।
प्रचण्डले यी विषयमा अभियान अघि बढाउने जिम्मेवारी वामपन्थी शक्तिहरूले लिनुपर्ने बताए। नेकपा एमाले र नेकपा मसालसँग कार्यगत एकताका लागि प्रक्रिया अघि बढिरहेको जानकारी दिँदै उनले अन्य वामपन्थी दलसँग पनि सहकार्य र एकताका विषयमा छलफल भइरहेको बताए। शान्ति प्रक्रिया र संविधान निर्माणमा विगतमा सहकार्य गरेका राजनीतिक शक्तिहरूबीच पनि नयाँ परिस्थितिमा सहकार्य आवश्यक रहेको उनको भनाइ थियो। यसका लागि नेपाली कांग्रेससँग समेत संवादको प्रयास भइरहेको प्रचण्डले जानकारी दिए।
