पर्सामा प्रहरीले घरभित्र लुकाइछिपाइ राखेको ठूलो परिमाणको गाँजासहित एक वृद्धलाई पक्राउ गरेको छ ।
इलाका प्रहरी कार्यालय पटेर्वा सुगौलीबाट खटिएको प्रहरी टोलीले विशेष सूचनाका आधारमा बुधबार बिहान पटेर्वा सुगौली गाउँपालिका–४, भथौरास्थित एक घरमा खानतलासी गरेको थियो ।
खानतलासीका क्रममा स्थानीय ७० वर्षीय दुखी महतोको घरभित्र प्लास्टिकमा प्याक गरी लुकाइराखेको १८ किलो ७०० ग्राम गाँजा फेला परेको प्रहरीले जनाएको छ । प्रहरीले गाँजा बरामद गर्नुका साथै महतोलाई नियन्त्रणमा लिएको हो ।
पक्राउ परेका महतोमाथि लागूऔषधसम्बन्धी कसुरमा थप अनुसन्धान भइरहेको जिल्ला प्रहरी कार्यालय पर्साका प्रवक्ता एवं सूचना अधिकारी शेर मल्लले जानकारी दिएका छन् ।
