गाउँ ब्लक जग्गा नापी भएको करिब १२ वर्षपछि सिरहाको गोलबजार नगरपालिका–२ लालपुरका बासिन्दाले जग्गा दर्ता गराउन पाउने भएका छन्।
गोलबजार–२ वडा कार्यालयले सूचना जारी गर्दै गाउँ ब्लक जग्गा भोगचलन गरिरहेका जग्गाधनीलाई दर्ताका लागि निवेदन दिन आह्वान गरेको छ। जग्गाधनीलाई सहज होस् भनेर वडाले नापी कार्यालयका कर्मचारीलाई वडामै बोलाएर निवेदन लिने व्यवस्था मिलाएको जनाएको छ।
वडा अध्यक्ष सुकदेव सिंहका अनुसार लहानस्थित नापी कार्यालयसम्म पुग्दा लाग्ने यातायात खर्च र कागजात तयार पार्न हुने झन्झट कम गर्न वडामै सेवा दिन लागिएको हो। “वडाको निरन्तर मेहनत र पहलपछि नापी कार्यालयका कर्मचारीलाई वडामै ल्याएर जग्गा दर्ताको प्रक्रिया अघि बढाउन लागेका छौं,” उनले भने, “जग्गाधनीलाई सहज होस् भनेर वडाले आफ्नै खर्चमा निवेदन लिने व्यवस्था मिलाएको छ। निवेदन तयार गर्नसमेत वडाले सहयोग गर्छ।”
वडाका अनुसार भदौ २९ गते सोमबारदेखि एक सातासम्म बिहान ९ बजेदेखि साँझ ५ बजेसम्म वडा कार्यालयबाट गाउँ ब्लक जग्गा दर्ताका लागि निवेदन लिइनेछ।
साविक लालपुर गाविसअन्तर्गत वडा नम्बर ३ देखि ८ सम्म गरी २७ कित्ता र करिब २० बिघा गाउँ ब्लक जग्गा आर्थिक वर्ष २०७१र७२ मा नापी भएको वडा अध्यक्ष सिंहले जानकारी दिए।
उनका अनुसार साविक वडा नम्बर २ मा ७ कित्ता, वडा नम्बर ४ मा २, वडा नम्बर ५ मा ४, वडा नम्बर ६ मा ५, वडा नम्बर ७ मा ३ र वडा नम्बर ८ मा ६ कित्ता गाउँ ब्लक जग्गा नापी भएको थियो।
नापी भएको लामो समय बितिसक्दा पनि दर्ता प्रक्रिया अघि बढ्न नसक्दा स्थानीय बासिन्दा आफूले भोगचलन गर्दै आएको जग्गाको स्वामित्व कायम गर्नबाट वञ्चित हुँदै आएका थिए। अब वडा कार्यालयको पहलमा दर्ता प्रक्रिया अघि बढ्ने भएपछि स्थानीयलाई सहज हुने अपेक्षा गरिएको छ।
_LFG6skP2d6-1789354448.jpg)
