यमनका हुथी विद्रोहीले साउदी अरबले पछिल्लो २४ घण्टाको अवधिमा यमनका विभिन्न स्थानमा ५४ वटा हवाई आक्रमण गरेको दाबी गरेका छन् ।
हुथी सैन्य प्रवक्ता याह्या सारीले सोमबार वक्तव्य जारी गर्दै साउदी वायुसेनाले एफ–१५ र टाइफुन लडाकु विमान प्रयोग गरी यमनका विभिन्न क्षेत्रमा आक्रमण गरेको बताएका हुन् । उनका अनुसार ताइज, लहज, जौफ, मारिब र होदेइदा क्षेत्रमा ती हवाई आक्रमण भएका छन्। यद्यपि, हुथीले सार्वजनिक गरेको आक्रमणसम्बन्धी दाबीको स्वतन्त्र पुष्टि भने हुन सकेको छैन ।
यसैबीच, हुथीहरूले पनि साउदी अरबका सैन्य प्रतिष्ठानलाई लक्षित गरी मिसाइल तथा ड्रोन आक्रमण गरेको दाबी गरेका छन्। पछिल्लो समय रेड सीको तटीय क्षेत्रमा हुथीहरूको गतिविधि बढिरहेको बताइएको छ । हुथी समूहले रेड सीको तट तथा बाब अल–मन्डेब जलमार्गमा आफ्नो प्रभाव कायम रहेको दाबी गर्दै आएको छ। अन्तर्राष्ट्रिय व्यापार तथा सामुद्रिक यातायातका दृष्टिले महत्वपूर्ण मानिने बाब अल–मन्डेबको रणनीतिक महत्त्व पछिल्लो समय थप बढेको छ ।
यमनमा लामो समयदेखि जारी द्वन्द्वका कारण साउदी नेतृत्वको गठबन्धन र हुथी समूहबीच पटक–पटक सैन्य तनाव हुँदै आएको छ ।
