नियमित रूपमा केही समय पैदल हिँड्ने बानीले स्वास्थ्यमा सकारात्मक प्रभाव पार्ने विभिन्न अध्ययनहरूले देखाएका छन् । नयाँ अध्ययनले दैनिक १० मिनेट तीव्र गतिमा हिँड्दा समेत अकाल मृत्युको जोखिम घट्न सक्ने देखाएको छ ।
मेडिकल जर्नल जामा इन्टरनल मेडिसिन मा प्रकाशित अध्ययनअनुसार दैनिक १० मिनेट छिटो हिँड्ने बानीले अकाल मृत्युको जोखिम करिब ७ प्रतिशतसम्म कम हुन सक्ने उल्लेख छ। हिँड्ने समयलाई दैनिक २० मिनेट पुर्याउँदा यस्तो जोखिम करिब १३ प्रतिशत र ३० मिनेटसम्म पुर्याउँदा १७ प्रतिशतसम्म कम हुन सक्ने अध्ययनले देखाएको छ । यसबाट नियमित शारीरिक गतिविधि र विशेषगरी तीव्र गतिमा हिँड्नु स्वास्थ्यका लागि महत्वपूर्ण रहेको संकेत गर्छ ।
त्यस्तै, हार्वर्ड मेडिकल स्कुलसँग सम्बन्धित अध्ययनहरूले नियमित रूपमा दैनिक ३० मिनेट हिँड्दा मुटुसम्बन्धी रोगको जोखिम कम गर्न सहयोग पुग्ने देखाएका छन् ।
खाना खाएपछि केही समय पैदल हिँड्नु पनि स्वास्थ्यका लागि उपयोगी मानिन्छ। जर्मनीको रोबर्ट कोख इन्स्टिच्युटसँग सम्बन्धित अनुसन्धानमा खाना खाएपछि करिब १५ मिनेट हिँड्दा शरीरमा रगतमा चिनीको मात्रा नियन्त्रण गर्न सहयोग पुग्ने उल्लेख गरिएको छ ।
नियमित हिँडाइले शारीरिक सक्रियता बढाउनुका साथै टाइप–२ मधुमेह, मुटुसम्बन्धी समस्या तथा अन्य जीवनशैलीसँग सम्बन्धित स्वास्थ्य जोखिम घटाउन सहयोग गर्न सक्छ । विशेषज्ञहरूका अनुसार व्यस्त जीवनशैली भएका व्यक्तिले समेत दैनिक छोटो समयबाट पैदल हिँड्न सुरु गरेर क्रमशः समय र गति बढाउन सक्छन्। तर कुनै व्यक्तिको स्वास्थ्य अवस्था वा शारीरिक सीमाअनुसार व्यायामको उपयुक्त मात्रा फरक हुन सक्ने भएकाले आवश्यक परे स्वास्थ्यकर्मीसँग परामर्श गर्नु उपयुक्त हुन्छ ।
