प्रादेशिक अस्पताल जनकपुरमा उपचारका क्रममा चिकित्सकमाथि कुटपिट भएको घटनाप्रति चिकित्सक संघले विरोध जनाएको छ ।
बिहीबार प्रादेशिक अस्पताल जनकपुरमा प्रसूति सेवाका लागि आएकी महिलाका आफन्तले काउन्सिलिङ गरिरहेका चिकित्सक डा. सरोज साहमाथि हातपात गर्नुका साथै उनको मोबाइलसमेत खोसेर लगेपछि चिकित्सकको सुरक्षाको विषय पुनः उठेको हो । घटनामा डा. साहको अनुहार, टाउको र हातमा चोट लागेको बताइएको छ।
अस्पतालका अनुसार जटिल प्रकृतिको केस भएकाले बिरामीको शल्यक्रियामार्फत प्रसूति गराउनुपर्ने अवस्था थियो। शल्यक्रियाअघि चिकित्सकले बिरामीका आफन्तलाई उपचारका क्रममा आउन सक्ने जोखिम तथा सम्भावित जटिलताबारे जानकारी गराएका थिए । अस्पतालका सूचना अधिकारी डा. रामज्ञान यादवका अनुसार चिकित्सकले उपचारसम्बन्धी जोखिम स्वीकार गरेको स्वीकृतिमा हस्ताक्षर गर्न बिरामीका आफन्तलाई आग्रह गरेपछि विवाद उत्पन्न भएको थियो। विवादकै क्रममा डा. साहमाथि कुटपिट भएको यादवले बताए ।
घटनाप्रति अस्पताल प्रशासनले आपत्ति जनाउँदै कार्यस्थलमै चिकित्सक तथा स्वास्थ्यकर्मीमाथि हुने कुटपिट गम्भीर विषय भएको जनाएको छ । यस्ता घटनाले स्वास्थ्यकर्मीको मनोबलमा असर पार्नुका साथै उपचार सेवा प्रभावित हुन सक्ने अस्पतालको भनाइ छ । घटनाको विरोध गर्दै चिकित्सक संघले स्वास्थ्यकर्मीको सुरक्षा र सम्मान सुनिश्चित गर्न सम्बन्धित निकायसँग माग गरेको छ। संघले अस्पताल परिसरमा सुरक्षित कार्य वातावरण बनाउन तथा घटनामा संलग्न व्यक्तिमाथि आवश्यक कानुनी कारबाही गर्न आग्रह गरेको छ ।
चिकित्सकहरूले स्वास्थ्य संस्थामा चिकित्सक तथा स्वास्थ्यकर्मीमाथि हुने दुर्व्यवहार र कुटपिटका घटना दोहोरिन नदिन अस्पताल प्रशासन तथा सुरक्षा निकायले प्रभावकारी सुरक्षा व्यवस्था गर्नुपर्ने बताएका छन् ।
