लायन्स क्लब अफ वीरगंज संस्कृति गोल्ड, लायन्स क्लब अफ वीरगंज मेट्रोसिटी र तेरापन्थ युवक परिषद् वीरगंजको संयुक्त आयोजनामा शुक्रबार वीरगंजमा रक्तदान कार्यक्रम सम्पन्न भएको छ ।
रक्त अभावका कारण बिरामीको उपचारमा आउन सक्ने समस्या न्यूनीकरण गर्ने उद्देश्यले आयोजित कार्यक्रममा विभिन्न क्षेत्रका युवा तथा सर्वसाधारणको सहभागिता रहेको थियो । कार्यक्रममा २५ युनिट रगत संकलन भएको आयोजकले जनाएको छ ।
लायन्स क्लब अफ पोखरियाका अध्यक्ष नेजामुद्दीन शमानीले रक्तदानलाई मानवीय सेवाको महत्वपूर्ण कार्यका रूपमा लिनुपर्ने बताए । उनले नियमित रक्तदानले आकस्मिक तथा जटिल अवस्थामा बिरामीका लागि आवश्यक रगतको उपलब्धता सहज बनाउन सहयोग पुग्ने बताए ।
कार्यक्रममा रक्तदानको महत्वबारे जानकारी दिँदै नियमित रक्तदानले रगतको अभाव न्यूनीकरण गर्न महत्वपूर्ण भूमिका खेल्ने बताइएको थियो ।
संकलित रगत आवश्यकताअनुसार बिरामीको उपचारमा प्रयोग गरिने आयोजक संस्थाहरूले जनाएका छन् । कार्यक्रममा सहभागी रक्तदाता, स्वयंसेवक तथा कार्यक्रम सफल बनाउन सहयोग गर्ने सम्पूर्ण व्यक्ति र संस्थाप्रति आयोजकहरूले आभार व्यक्त गरेका छन् ।
भिडियाे रिपाेर्ट
‘रक्तदान जीवनदान’ भन्ने भावनासहित आयोजित कार्यक्रमले सामाजिक सेवाप्रति युवाहरूको सक्रिय सहभागिता र मानवीय उत्तरदायित्वलाई थप बलियो बनाएको आयोजकहरूको भनाइ छ ।
