हुलाकी राजमार्गअन्तर्गत रौतहटको गोरैता–जयनगर–हरनहिया सडकखण्डको मर्मत तथा निर्माण कार्य मौलापुर नगरपालिकाले सुरु गरेको छ ।
संघीय सरकारको कार्यक्षेत्रभित्र पर्ने राष्ट्रिय महत्वको सडक लामो समयदेखि जीर्ण अवस्थामा रहे पनि सम्बन्धित निकायले मर्मतमा चासो नदेखाएपछि नगरपालिकाले आफ्नै पहलमा काम अघि बढाएको हो ।
मौलापुर नगरपालिकाकी प्रमुख रिनाकुमारी साहको पहलमा सडक मर्मत तथा निर्माण कार्य सुरु गरिएको जनाइएको छ । गोरैता–जयनगर–हरनहिया हुँदै कलैया र वीरगञ्जसम्म जोडिने उक्त सडक चाडपर्वका बेला अत्यधिक व्यस्त हुने मार्गमध्ये एक हो ।
सडक जीर्ण हुँदा स्थानीय बासिन्दा, यात्रु तथा सवारी चालकले लामो समयदेखि सास्ती खेप्दै आएका छन् । दैनिक आवागमनसँग प्रत्यक्ष जोडिएको सडकको अवस्था सुधार गर्न सम्बन्धित निकायले चासो नदेखाएको स्थानीयको गुनासो छ ।
सडक मर्मतका लागि स्थानीय सरकारले नै अग्रसरता लिनुपर्ने अवस्था आएपछि यस क्षेत्रका सांसद रवीन्द्र पटेल (धिरज) को भूमिकामाथि पनि स्थानीयले प्रश्न उठाएका छन् । सांसद पटेलको घरसमेत मौलापुर नगरपालिका–५ स्थित सोनरनियामा पर्छ । आफ्नै गाउँ र निर्वाचन क्षेत्रसँग जोडिएको महत्वपूर्ण सडकको समस्या समाधानका लागि संघीय सरकारबाट आवश्यक बजेट तथा कार्यक्रम सुनिश्चित गराउन उनले प्रभावकारी पहल गर्न नसकेको स्थानीयको आरोप छ ।
मौलापुर नगरपालिका–५ का स्थानीय सुनिल साहले संघीय सरकारको नेतृत्व आफ्नै पार्टीले गरिरहेको अवस्थामा समेत सडकको समस्या समाधान हुन नसक्नु विडम्बनापूर्ण भएको बताए ।
‘संघीय सरकारको मातहतमा रहेको आफ्नै गाउँको सडक निर्माण गराउन नसक्ने, तर अरूमाथि आरोप लगाउँदै हिँड्ने प्रवृत्ति जिम्मेवारीबाट पन्छिने काम मात्रै हो,’ साहले भने ।
उनका अनुसार उक्त सडक मर्मत तथा निर्माणका लागि हरेक वर्ष करोडौँ रुपैयाँ विनियोजन हुने गरेको भए पनि त्यसको प्रभावकारी कार्यान्वयन हुन सकेको छैन । सडकको अवस्था सुधार गर्न आवश्यक बजेट र स्रोत परिचालनका लागि प्रभावकारी पहल नहुनु दुःखद भएको उनको भनाइ छ ।
साहले जनताको दैनिक आवागमनसँग प्रत्यक्ष जोडिएको सडक निर्माणमा राजनीतिक आरोप–प्रत्यारोपभन्दा पनि परिणाममुखी पहल आवश्यक रहेको बताए ।
यसैबीच, आम जनता पार्टी (आजपा) का अध्यक्ष प्रभु साहले विकास निर्माणका क्षेत्रमा मौलापुर नगरपालिकाले देखाएको अग्रसरताको प्रशंसा गरेका छन् । संघीय सरकारको जिम्मेवारीमा रहेको सडकको मर्मतमा स्थानीय सरकारले पहल गर्नु सकारात्मक भएको उनको भनाइ छ ।
