गुठीको जग्गामा लामो समयदेखि बसोबास गर्दै आएका परिवारलाई हटाउने गरी अघि बढाइएको अतिक्रमण हटाउने अभियानको विरोधमा जनकपुरधाममा प्रदर्शन गरिएको छ ।
गुठी–कुट्टी घरजग्गा व्यवस्थापन संघर्ष समितिको नेतृत्वमा जनकपुरधामका विभिन्न क्षेत्रमा प्रदर्शन गरिएको हो। प्रदर्शनपछि समितिले आफ्ना मागसहित गुठी संस्थान, जनकपुरधाम उपमहानगरपालिका र जिल्ला प्रशासन कार्यालयमा ज्ञापनपत्रसमेत बुझाएको छ ।
संघर्ष समितिका अध्यक्ष सन्तोष साहले विगतमा पटक–पटक सरकारसमक्ष माग राख्दै ज्ञापनपत्र बुझाए पनि सम्बोधन नभएपछि आन्दोलनमा उत्रिनुपरेको बताए ।
उनका अनुसार जनकपुरधामका विभिन्न गुठी तथा कुट्टीको जग्गामा करिब ३० देखि ३५ हजार मानिसले पुस्तौँदेखि घर बनाएर बसोबास गर्दै आएका छन्। तर, सरकारले पर्याप्त तथ्यांक तथा वास्तविक अवस्थाको अध्ययन नगरी उनीहरूलाई अतिक्रमणकारीका रूपमा चित्रण गर्दै घरटहरा हटाउने प्रक्रिया अघि बढाएको समितिको आरोप छ ।
समितिले गुठीको जग्गामा बसोबास गरिरहेका परिवारको वास्तविक अवस्था र जग्गाको यकिन विवरण तयार गरी उचित प्रक्रिया अपनाउन माग गरेको छ। साथै, सरकारले आवश्यक मुआब्जा उपलब्ध गराएर लामो समयदेखि बसोबास गर्दै आएका परिवारको जग्गालाई रैथानी नम्बरी जग्गामा परिणत गर्नुपर्ने उनीहरूको माग छ ।
अध्यक्ष साहले सरकारले माग सम्बोधन नगरी गुठीको जग्गा खाली गराउने प्रक्रिया अघि बढाए थप कडा आन्दोलन गर्ने चेतावनी दिए ।
संघर्ष समितिले गुठीको जग्गासम्बन्धी समस्या समाधानका लागि सम्बन्धित पक्षसँग वार्ता गरी दीर्घकालीन समाधान खोज्नुपर्ने मागसमेत गरेको छ ।
