मधेश केन्द्रित विभिन्न राजनीतिक दलबाट विद्रोह गरेका युवाहरूको समूहले वैकल्पिक राजनीतिक शक्ति निर्माण गर्ने उद्देश्यसहित ‘हुँकार मधेश’ अभियान घोषणा गरेको छ ।
काठमाडौंमा शुक्रबार आयोजित कार्यक्रममा अभियानको औपचारिक घोषणा गरिएको हो । परम्परागत राजनीतिक शैली र संस्कारबाट आजित नयाँ पुस्तालाई सक्रिय राजनीतिमा जोड्ने उद्देश्यले अभियान सुरु गरिएको आयोजकहरूले बताएका छन् ।
राजनीतिलाई ‘डर्टी गेम’का रूपमा चित्रित गर्ने प्रवृत्तिका कारण सक्षम युवाहरू राजनीतिबाट टाढिँदै गएको भन्दै अभियानले उनीहरूलाई सक्रिय राजनीतिमा सहभागी गराउने लक्ष्य लिएको जनाएको छ । अभियानले मधेशका विविध राजनीतिक, सामाजिक, आर्थिक तथा सांस्कृतिक मुद्दालाई प्राथमिकताका साथ उठाउने र युवा नेतृत्वलाई अघि बढाउने जनाएको छ ।
अभियानले नेपाललाई सार्वभौमसत्ता सम्पन्न, स्वतन्त्र तथा बहुभाषिक राज्यका रूपमा स्वीकार गर्दै संघीय लोकतान्त्रिक गणतन्त्रात्मक शासन प्रणाली, समानुपातिक समावेशीता र नागरिकको सर्वोच्चताप्रति प्रतिबद्धता जनाएको छ ।
देशमा विद्यमान राजनीतिक, आर्थिक, सामाजिक तथा सांस्कृतिक समस्याको समाधानका लागि संघीयतावादी, पहिचानवादी, अधिकारवादी तथा प्रगतिशील शक्तिहरू एकजुट हुनुपर्ने आवश्यकता अभियानले औँल्याएको छ ।
घोषणा कार्यक्रममा जसपा नेपालका पूर्वमहासचिव रामकुमार शर्मा, राजनीतिक विश्लेषक सिएन थारु, बुद्धिछिरिङ मोक्तान, लोकतान्त्रिक विद्यार्थी संगठनका पूर्वअध्यक्ष रोशन कुमार शर्मा तथा राष्ट्रिय मुक्ति पार्टीबाट आएका चन्द्रनाथ मिश्रलगायतको सहभागिता थियो ।
भिडियाे रिपाेर्ट
