महोत्तरीको भंगहा नगरपालिकामा लामो समयदेखि प्रमुख प्रशासकीय अधिकृत हाजिर नभएपछि नगरप्रमुख संजिवकुमार साहले नगरपालिका कार्यालयसहित नौवटै वडा कार्यालयमा तालाबन्दी गरेका छन् ।
प्रमुख प्रशासकीय अधिकृत तत्काल हाजिर नभए अतिआवश्यक सेवाबाहेकका काम बन्द गर्ने चेतावनी दिएका मेयर साहले तीनदिने अल्टिमेटम सकिएपछि सोमबार नगरपालिका र सबै वडा कार्यालयमा तालाबन्दी गरेका हुन् ।
भूमि व्यवस्था, सहकारी, संघीय मामिला तथा सामान्य प्रशासन मन्त्रालयको स्थानीय तह कर्मचारी प्रशासन शाखाले भदौ १ गते खिमराज भुसाललाई भंगहा नगरपालिकाको प्रमुख प्रशासकीय अधिकृतका रूपमा खटाएको थियो। तर, मन्त्रालयको पत्र आएको लामो समय बितिसक्दा पनि भुसाल कार्यालयमा हाजिर नभएको मेयर साहको भनाइ छ ।
प्रमुख प्रशासकीय अधिकृतको व्यवस्था गर्न आफूले पटक–पटक मन्त्रालयमा पुगेर आग्रह गरे पनि समस्या समाधान नभएको साहले बताएका छन्। मन्त्रीलाई भेटेर समस्या राख्न खोज्दा भेट नपाएको र स्वकीय सचिवमार्फत पनि सुनुवाइ नभएको उनको दाबी छ।
प्रमुख प्रशासकीय अधिकृत नहुँदा नगरपालिकाको प्रशासनिक तथा वित्तीय काम प्रभावित भएको साहले बताए। कर्मचारी तथा पदाधिकारीको तलब–भत्ता, विकास योजनाको कार्यान्वयन र नियमित सेवा प्रवाहमा समेत समस्या भइरहेको उनको भनाइ छ ।
दसैँ नजिकिँदै गर्दा कर्मचारीलाई तलब उपलब्ध गराउनसमेत कठिनाइ हुने अवस्था आएको मेयर साहले बताएका छन् ।
तालाबन्दीपछि मेयर साहले कार्यालयको चाबी महोत्तरीका प्रमुख जिल्ला अधिकारी इन्द्रदेव यादवलाई बुझाएका छन्। नगरपालिकाले प्रमुख प्रशासकीय अधिकृतलाई तत्काल हाजिर गराई प्रशासनिक, वित्तीय तथा नियमित सेवा प्रवाह सुचारु गर्न सम्बन्धित मन्त्रालयसँग माग गरेको छ ।
